Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 309 Hüküm no: 241 Orijinal metin no: [55a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hanım’ın ölmeden önce cariyesi Zeliha’yı tedbir-i mutlak ile azat ettiği Husûs-ı âti’l-beyanın mahâllinde istimâ‘ ve tahrîri iltimâs olunmağın savb-ı şer‘-i enverden Mevlânâ Hasan Efendizâde el-Hâc Abdullah Efendi irsâl olunup ol dahi mahmiye-i İstanbul’da Saraç Doğan mahâllesinde bundan akdem vefât eden merhûme Fâtıma Hanım bt. el-merhûm Receb Paşa’nın hayâtında sâkine olduğu menzile varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde merhûme-i mezbûreye rıkk-ı sâbıkını mu‘terife işbu orta boylu kara kaşlı kara gözlü Gürciyetü’l-asl Müslimetü’l-millet bâ‘isetü’l-kitâb Zeliha bt. Abdullah meclis-i ma‘kūd-ı mezkûrda merhûme-i mezbûrenin vâlidesi ve li-üm karındaşı Âişe bt. İbrahim Ağa nâm sagīrenin tesviye-i umûruna cânib-i şer‘den mansûbe vasîsi olmağla rıkk olup terekeden olmak üzere kendüye bi’l-verâse ve bi’l-vesâye vâzı‘atü’l-yed olup zâtı ta‘rîf-i şer‘î ile mu‘arrefe olan Hadîce Hatun bt. Abdullah ile merhûmenin [55b] li-eb er karındaşı ve usûbet-i nesebiye [cihetinden] vârisi olup hâlâ Sivas vâlisi olan emîrü’l-ümerâi’l-kirâm sa‘âdetlü Ahmed Paşa mahzarında üzerlerine da‘vâ ve takrîr-i kelâm edip seyyidem merhûme-i mezbûre Fâtıma Hanım bt. el-merhûm el-mezbûr Receb Paşa hayâtında târîh-i fevtinden iki sene mukaddem yedinde câriye-i memlûkesi olduğum hâlde huzûr-ı Müslimînde beni tedbîr-i mutlak ile müdebbere ve bi-emrillâhi te‘âlâ merhûme oldukda terekesinin sülüsânı bana yüz elli guruş verile deyü vasiyet edip musırraten-aleyhâ merhûme oldukda terekesinin sülüsü fetâ kıymetinin sülüsânına ve meblağ-ı mûsâ-bih-i mezkûra müsâ‘id olmağla ben sâir harâir-i asliyât gibi hürre olmuş iken vasiyy-i mezbûre ile mûmâ-ileyh el-Hâc Ahmed Paşa bana rıkk olup terekeden olmak üzere bi-gayrı hakkın vaz‘-ı yed ve meblağ-ı mûsâ-bih-i mezkûru sülüs-i tereke-i merkūme-i mezbûreden taleb eylediğimde vermede ta‘allül eder, suâl olunsun dedikde gıbbe’s-suâl ve’l-inkâr müdde‘î-i mevsûfe-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden mahâlle-i mezbûre ahâlîsinden Mehmed Çelebi b. Abdullah ve nisâ-i sâlihâtdan Âişe Hatun bt. Mustafa ve Saliha Hatun bt. Abdullah li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fi’l-hakīka şahsı rü’yetimiz ile ma‘lûmumuz olan merkūme Fâtıma Hanım bt. el-merhûm Receb Paşa hayâtında târîh-i fevtinden iki sene mukaddem müdde‘iye-i mevsûfe-i mezbûre Zeliha’yı yedinde câriye-i memlûke olduğu hâlde huzûrumuzda tedbîr-i mutlak ile müdebbere bi-emrillâhi te‘âlâ merhûm oldukda terekesinin sülüsünden yüz elli guruş müdde‘iye-i mezbûreye verile deyü vasiyet edip musırraten-aleyhâ merhûme oldukda terekesinin sülüsü müdde‘iye-i mezbûrenin fetâ kıymetinin sülüsânına ve meblağ-ı mûsâ-bih-i mezkûre müsâ‘id olmağla müdde‘iye-i mezbûre sâir harâir-i asliyât gibi hürre olmuşdu, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel Ahmed Çelebi b. İsmail ve Ali Çelebi [b.] Abdullah ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 3 min-Recebi’l-ferd sene 1143. Şuhûdü’l-hâl: Yusuf Efendi b. Hamza, Kethüdâ el-Hâc Mehmed Ağa b. ( ), es-Seyyid Mahmud Efendi b. es-Seyyid Mehmed, Mustafa Çelebi b. Hüseyin, Mehmed Çelebi b. Ahmed