Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 309 Hüküm no: 240 Orijinal metin no: [55a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Süleyman Efendi’den küçük kızı Hanife’ye kalan evdeki hakkının diğer varislerin hisseleriyle birlikte satılması Mahmiye-i İstanbul’da Cafer Ağa mahâllesinde sâkin iken bundan akdem vefât eden Süleyman Efendi b. Mehmed’in sulbiye sagīre kızı Hanife’nin tesviye-i umûruna bâ-hüccet-i şer‘iyye vasiyy-i muhtârı Mahmud Efendi b. el-Hâc İbrahim meclis-i şer‘-i şerîf-i enverde bi’l-vesâye takrîr-i kelâm ve ta‘bîr ani’l-merâm edip merkūm Cafer Ağa nâm sâhibü’l-hayrın binâ eylediği câmi‘-i şerîfin ta‘mîrine meşrûta evkāfından müteveffâ-yı mezbûrun ile’l-vefât taht-ı tasarrufunda olup ba‘de-vefâtihî intikāl-i âdî ile müteveffâ-yı mezbûrun sulbiye kebîre kızları Fâtıma ve Âişe’ye ve vasîsi olduğum sagīre-i mezbûreye intikāl edip mahâlle-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât vakıf menzilden verese-i kibâr hisselerini ferâğa âhara âzimler olup sagīre-i mezbûrenin hissesi kendüye nef‘ verir vech üzere ifrâz mümkin olmadığından mâ‘adâ menzil-i mahdûd-ı mezkûr harâba müşrif ve hâsılı harcına vefâ etmeyip sagīre-i mezbûrenin hissesini verese-i kibâr ile ma‘an ba‘de’l-müzâyede ve ınkıtâ‘i’r-rağbe bedel-i misli ve bâ-ma‘rifet-i mütevellî âhara ferâğ ve bedeli istirbâh ve istiğlâl olunmak sagīre-i mezbûre hakkında nef‘i mahz olmağın sagīre-i mezbûrenin hissesini ber-vech-i muharrer verese-i kibâr ile ma‘an âhara ferâğa cânib-i şer‘den mezûn olmak bi’l-vesâye matlûbumdur dedikde vasiyy-i mezbûrun kelimât-ı meşrûhası vâkı‘a mutâbık idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri sagīre-i mezbûrenin menzil-i mahdûd-ı mezkûrda olan hissesini verese-i kibâr ile ma‘an âhara ferâğa vasiyy-i mezbûra izin birle mâ vaka‘a bi’t-taleb ketb olundu. Fî 22 min-Cemâziyelâhir sene 1143. Şuhûdü’l-hâl: Salih Efendi b. el-Hâc Abdi, Abdurrahman Efendi b. Hüseyin el-Müezzin, es-Seyyid Ahmed Efendi b. el-Hâc Yusuf el-Hatîb, Abdullah Çelebi b. Osman, Mehmed Bey b. Mesud