Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 311 Hüküm no: 245 Orijinal metin no: [55b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Astarcı Marat’ın vefat eden Süleyman Ağa’dan aldığı borcu varislerine ödediği Mahmiye-i İstanbul’da ( ) mahâllesinde sâkin olup bundan akdem vefât eden sâbıkā sadr-ı âlî kethüdâsı çukadârlarından Süleyman Ağa b. Hamza’nın sulbî sagīr oğlu Hasan ve sulbiye sagīre kızı Âişe’nin tesviye-i emrlerine bâ-hüccet-i şer‘iyye vasiyy-i muhtârları ve li-ebeveyn ammileri Mustafa Ağa b. el-mezbûr Hamza meclis-i şer‘-i şerîf-i lâzimü’t-tevkīrde mahmiye-i mezbûrede Kebeciler Hanı tüccârından hâmilü’s-sifr Astarcı Marat v. Yasef nâm zimmî muvâcehesinde bi’l-vesâye ikrâr ve takrîr-i kelâm edip işbu yedimde olan bin yüz otuz dokuz senesi Şa‘bân’ının on beşinci günü târîhiyle müverrah ve mümzâ ve mahtûm temessük mantûkunca mesfûr Marat zimmîye idâne ve teslîm edip ol dahi ber-vech-i muharrer istidâne ve kabz eylediği yedi yüz kırk sekiz guruş asl-ı mâl-ı sagīrân-ı mezbûrân ile hâric ez-temessük murâbahadan müctemi‘ olan yüz otuz altı guruş cem‘an sekiz yüz seksen dört guruşun iki yüz altmış beş guruşunu bundan akdem mesfûr Marat bana def‘ u teslîm edip ben dahi yedinden ahz u kabz eyledikden sonra bâkī kalan altı yüz on dokuz guruşu dahi mesfûr Marat bana def‘ u teslîm edip ben dahi ber-vech-i muharrer yedinden tamâmen alıp kabz edip min-ba‘d meblağ-ı mecmû‘-ı mezkûr sekiz yüz seksen dört guruşdan mesfûr Marat yedinde ve zimmetinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mesfûr Marat meclis-i mezbûrda vasiyy-i merkūm Mustafa Ağa mahzarında ikrâr ve takrîr-i kelâm edip mezbûr Mustafa Ağa’ya medfû‘um olan meblağ-ı mezkûr sekiz yüz seksen dört guruşa müte‘allıka âmme-i de‘âvî ve kâffe-i mutâlebâtdan ve eymân ve muhâsamâtdan sagīrân-ı mezbûrân ile vasiyy-i mezbûr [56a] Mustafa Ağa’nın zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 6 min-Recebi’l-ferd sene 1143. Şuhûdü’l-hâl: Abdülkerim Çelebi b. Cafer, Mustafa Çelebi b. Ali, el-Hâc Abdullah Efendi b. Hasan Efendi, Abdülbaki Efendi b. Ahmed, Salih Efendi b. Abdülbaki, el-Hâc Feyzullah b. Mehmed Efendi, Halil Efendi b. Şaban