Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 312 Hüküm no: 246 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülbaki b. Mehmed’in vefatıyla çocuklarına kalan tamire muhtaç evin tamirine izin verildiği Mahmiye-i İstanbul’da Manisalı Çelebi mahâllesinde sâkin iken bundan akdem vefât eden el-Hâc Abdülbaki b. Mehmed’in evlâd-ı sıgārı Mehmed ve Emine ve Fâtıma’nın vâlideleri ve tesviye-i emrlerine kıbel-i şer‘den mansûbe vasîleri Ümmühani Hatun bt. el-Hâc Ahmed’in hâlâ zevci ve tarafından vekîl-i müsecceli işbu bâ‘isü’l-kitâb Süleyman Beşe b. Hasan meclis-i şer‘-i şerîf-i enverde bi’l-vekâle ikrâr ve takrîr-i kelâm edip zevcem ve müvekkilem mezbûrenin vasîsi olduğu sıgār-ı mezbûrûnun babaları müteveffâ-yı mezbûrun ile’l-vefât taht-ı tasarrufunda olup ba‘de-vefâtihî intikāl-i âdî ile sıgār-ı mezbûrûna intikāl edip mahâlle-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât hâlâ sâkin oldukları vakıf menzilin ba‘zı mahâlli bi-emrillâhi te‘âlâ bu sene-i mübârekede vâki‘ olan harîkde muhterik ve ba‘zı mahâlli münhedim ve kābil-i süknâ olmayıp ta‘mîre muhtâc olmağla menzil-i mezbûru kadr-ı ma‘rûf meblağ ile ta‘mîre kıbel-i şer‘den mezûn olmak bi’l-vesâye matlûbumdur dedikde vekîl-i mezbûrun kelimât-ı meşrûhası vâkı‘a mutâbık idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’ş-şerîf zâhir ve mukarrer olmağın hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri menzil-i mezbûru kadr-ı ma‘rûf meblağ ile ta‘mîre müvekkile-i mezbûre Ümmühani Hatun’a izin vermeğin mâ vaka‘a bi’t-taleb ketb olundu. Fî 6 Receb sene 1143 Şuhûdü’l-hâl: Çorbacı Hasan Ağa b. Rüstem, el-Hâc Mustafa Ağa b. Mehmed, Ahmed Çelebi b. Veli, el-Hâc İsmail b. el-Hâc Ahmed, el-Hâc Ahmed b. Abdullah.