Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 313 Hüküm no: 247 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şam’da vefat eden Nalband Ali’ye borcu olan Halil Efendi’nin varislere borcunu ödediği Husûs-ı âti’l-beyanın mahâllinde ketb ü tahrîri için savb-ı şer‘-i şerîf-i enverden Mevlânâ Hasan Efendizâde el-Hâc Abdullah Efendi irsâl olunup ol dahi mahmiye-i İstanbul’da Âşıkpaşa mahâllesinde sâkin sâbıkā cizye muhâsebecisi olan umdetü erbâbi’t-tahrîr ve’l-kalem el-Hâc Halil Efendi b. el-Hâc Ali Ağa’nın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Mollagürânî mahâllesi ahâlîsinden olup bundan esbak tarîk-i hacc-ı şerîfde medîne-i Şam’da vefât eden Nalband el-Hâc Ali b. Mustafa’nın verâseti zevce-i menkûha-i metrûkesi Âişe Hatun bt. Abdullah’a ve sulbî sagīr oğulları Mehmed ve Mustafa’ya münhasıra olduğu şer‘an zâhir ve mukarrer oldukdan sonra sagīrân-ı mezbûrânın vâlideleri ve tesviye-i emrlerine bâ-hüccet-i şer‘iyye vasiyy-i muhtârları mezbûre Âişe Hatun bt. Mustafa b. Abdullah ve mezbûre Rukıye Hatun bt. Abdullah b. Abdullah taraflarından husûs-ı âti’l-beyanda ikrâra vekîl olduğu zâtlarını ma‘rifet-i şer‘le ârifân mahmiye-i mezbûrede Kasab Timur Hatun [Timurhan] mahâllesinde sâkin Nalband el-Hâc Mehmed Ağa b. el-Hâc Ali ve mârrü’z-zikr Mollagürânî mahâllesinde sâkin Nalband el-Hâc Ahmed Ağa b. el-Hâc Mehmed şehâdetleriyle mahzar-ı hasm-ı câhidde sâbit ve sübût-ı vekâletine hükm-i şer‘î lâhık ve mahkûmün-bih olan İbrahim Çelebi b. Halil meclis-i ma‘kūd-ı mezkûrda hâfizü’l-kitâb mûmâ-ileyh el-Hâc Halil Efendi tarafından tasdîka vekîl-i müsecceli Medhî? Mehmed Efendi b. İbrahim mahzarında bi’l-vekâle ikrâr ve takrîr-i kelâm edip müvekkilelerim mezbûretân Âişe Hatun ve Rukıye Hatun mûrisleri müteveffâ-yı mezbûr el-Hâc Ali’nin müvekkil-i mûmâ-ileyh el-Hâc Halil Efendi zimmetinde nalband emti‘ası semeninden bâ-temessük hakkı olan sekiz yüz guruşu müteveffâ-yı mezbûrun hayâtında müvekkil-i mûmâ-ileyh tamâmen ahz u kabz ettiklerinden sonra müteveffâ-yı mezbûr el-Hâc Ali’nin mahmiye-i mezbûrede Rüstem Paşa kurbünde vâki‘ dükkânında mevcûd eşyâ-i memlûkesinden hâdimi işbu hâzır bi’l-meclis Hasan yedinden müvekkil-i mûmâ-ileyh el-Hâc Halil Efendi iştirâ ve kabz eylediği ber-mûceb-i defter-i müfredât nalband emti‘ası ve sâir eşyâ-i ma‘lûme semenleri olan bin üç yüz on dört guruşu müvekkilelerim mezbûretân Âişe Hatun ve Rukıye Hatun’a tamâmen teslîm ettikde müvekkilelerim dahi tereke-i müteveffâ-yı mezbûrdan olmak üzere yedinden asâlet ve vesâyetleri hasebiyle bi’t-tamâm ve’l-kemâl ahz u kabz edip min-ba‘d meblağ-ı mecmû‘-ı mezbûr iki bin yüz on dört guruşdan müvekkil-i mûmâ-ileyh yedinde ve zimmetinde bir akçe ve bir habbe bâkī kalmayıp meblağ-ı mecmû‘-ı mezkûre ve sâire müte‘allıka âmme-i da‘vâdan müvekkil-i mûmâ-ileyh el-Hâc Halil Efendi’nin zimmetini müvekkilelerim mezbûretân Âişe Hatun ve Rukıye Hatun ibrâ-i âmm-ı râfi‘ü’l-hısâm ile bi’l-asâle ibrâ ve ıskāt eylediler dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ma‘an mürsel Osman b. Mustafa ve İbrahim b. Halil ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 7 min-Receb sene 1143. Şuhûdü’l-hâl: el-Hâc Hasan Ağa b. Mehmed, Yazıcı Hasan Efendi b. Mustafa, Yazıcı Hüseyin Efendi, Mehmed Çelebi Baklavacızâde, Abdülbaki Çelebi b. Abdurrahman Nalband, Köse el-Hâc Mustafa b. Abdullah, Kethüdâ Abdurrahman Çelebi b. el-Hâc Hasan, Mühürdâr Mehmed Ağa b. ( )