Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 316 Hüküm no: 249 Orijinal metin no: [56b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Abdullah’ın vefatıyla çocuklarına nafaka takdiri Mahmiye-i İstanbul’da Soğanağa mahâllesinde sâkin iken bundan akdem vefât eden el-Hâc Mustafa b. Abdullah’ın sulbî sagīr oğlu Mehmed ve sulbiye sagīre kızı Havva’nın vâlideleri ve tesviye-i emrlerine kıbel-i şer‘-i şerîfden mansûbe vasîleri işbu bâ‘isetü’l-kitâb Hanife Hatun bt. Abdullah talebiyle hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīrân-ı mezbûrânın nafaka ve kisveleri için babaları müteveffâ-yı mezbûrdan müntakil mâllarından sagīr-i mezbûr Mehmed’e yevmî dört para ve sagīre-i mezbûre Havva’ya yevmî iki para nafaka ve kisve-baha farz ve takdîr buyurup meblağ-ı mefrûz-ı mecmû‘-ı mezkûr beher yevm altı parayı sagīrân-ı mezbûrânın nafaka ve kisve ve sâir levâzım-ı zarûriyelerine harc u sarfa ve lede’l-iktizâ istidâneye ve inde’z-zafer mâllarına rücû‘a vasiyye-i mezbûre Hanife Hatun’a izin birle mâ vaka‘a bi’t-taleb ketb olundu. Fî 20 min-Rebî‘ülâhir sene 1143. Şuhûdü’l-hâl: el-Hâc Mehmed Ağa b. Ömer, İsmail Ağa b. İbrahim, İbrahim Çelebi b. Mustafa, Osman Çelebi b. Şaban, Salih Çelebi b. Ahmed