Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 356 Hüküm no: 288 Orijinal metin no: [63b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Mustafa’nın vasiyetini yerine getirmek üzere Kapıcı Mustafa’yı vasi tayin ettiği Husûs-ı âti’l-beyanın mahâllinde ketb ü tahrîri için iltimâs olunmağın savb-ı şer‘-i şerîf-i enverden mezûnen Mevlânâ es-Seyyid Ahmed Efendi irsâl olunup ol dahi mahmiye-i İstanbul’da Karaki Hasan Çelebi mahâllesinde sâkin iken bundan akdem vefât eden Hammâmî el-Hâc Mehmed b. Mustafa’nın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun ber-vech-i âtî vasiyy-i muhtâresi olduğunu iddi‘â eden işbu bâ‘isü’l-kitâb Kapıcı Mustafa b. Selim meclis-i ma‘kūd-ı mezkûrda müteveffâ-yı mezbûrun sulbî kebîr oğulları olmağla terekesine bi’l-verâse vâzı‘ü’l-yed olan Ahmed Çelebi ve Mehmed Çelebi mahzarlarında üzerlerine da‘vâ ve takrîr-i kelâm edip müteveffâ-yı mezbûr Hammâmî el-Hâc Mehmed b. Mustafa b. Abdullah hâl-i kemâl-i sıhhatinde târîh-i fevtinden bir ay mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz edip vech-i mesnûn üzere levâzım-ı techîz ve tekfînim görülüp düyûn-ı müsbetem kazâ olundukdan sonra sülüs-i mâlımdan ancak üç bin akçe ıskāt-ı salâtım için tasadduk oluna deyü vasiyet ve tenfîzine ve zevce-i menkûha-i metrûkesi Hadîce bt. Abdullah’ın batnında müstebîn hamlin hisse-i mevkūfesini ahz u kabz ve hıfza huzûr-ı Müslimînde beni vasiyy-i muhtâr nasb u ta‘yîn edip ben dahi muvâcehesinde ba‘de’l-kabûl musırran-aleyhâ vefât ettikde terekesinin sülüsü meblağ-ı mûsâ-bih-i mezkûra müsâ‘id olmağla tenfîz-i vesâyâ murâd eylediğimde mezbûrân mâni‘ olurlar, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden olup mahmiye-i mezbûrede sâkin Muslı Çelebi b. İbrahim ve Mahmud b. Ömer li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Hammâmî el-Hâc Mehmed b. Mustafa b. Abdullah hâl-i kemâl-i sıhhatinde târîh-i fevtinden bir ay mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ba‘de’l-ahz ve’l-kabz vech-i mesnûn üzere levâzım-ı techîz ve tekfînim görülüp düyûn-ı müsbetem kazâ olundukdan sonra sülüs-i mâlımdan ancak üç bin akçe ıskāt-ı salâtım için tasadduk oluna deyü vasiyet ve tenfîzine ve zevce-i menkûha-i metrûke Hadîce bt. Abdullah’ın batnında müstebîn hamlin hisse-i mevkūfesi ahz u kabz ve hıfza huzûrumuzda işbu müdde‘î-i mezbûr Kapıcı el-Hâc Mustafa b. Selim’i vasiyy-i muhtâr nasb u ta‘yîn edip ol dahi muvâcehesinde ba‘de’l-kabûl musırran-aleyhâ vefât ettikde terekesinin sülüsü meblağ-ı mûsâ-bih-i mezkûra müsâ‘iddir, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr, ba‘dehû ma‘an irsâl olunan İbrahim Çelebi b. Mehmed ve Ahmed Çelebi b. Hasan ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 26 min-Cemâziyelâhire sene 1143. Şuhûdü’l-hâl: el-Hâc Ali b. Hüseyin, İbrahim b. Yusuf, Hasan Ağa b. Ömer, Ömer Çelebi b. Selim, Mehmed Efendi b. Abdullah, el-Hâc Ali Ağa b. İbrahim, Hasan Bey b. Mahmud, el-Hâc Ebubekir Ağa b. el-Hâc Ömer, Ahmed Çelebi b. Hasan