Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 354 Hüküm no: 287 Orijinal metin no: [63b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ayşe Hatun’un eşiyle diğer varisler arasındaki miras davasına sulh olduğu Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i şerîf-i enverden Mevlânâ İskilibî Mehmed Efendi irsâl olunup ol dahi mahmiye-i İstanbul’da Debbâğ Yunus mahâllesinde sâkin el-Hâc Musazâde Osman Ağa b. el-Hâc Mustafa Ağa’nın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Samatya kurbünde el-Hâc Hüseyin mahâllesinde sâkin iken bundan akdem [vefât] eden Âişe Hatun bt. el-Hâc Mustafa Ağa’nın verâseti zevc-i metrûkü el-Hâc Mahmud b. Ahmed ile vâlidesi Emetullah Hatun bt. Mehmed Efendi’ye ve li-ebeveyn karındaşı mezbûr Osman Ağa’ya münhasıra olduğu şer‘an zâhir ve mukarrer oldukdan sonra mezbûr el-Hâc Mehmed Ağa meclis-i ma‘kūd-ı mezkûrda işbu bâ‘isü’l-kitâb mezbûr Osman Ağa ve zâtı ta‘rîf-i şer‘î ile mu‘arrefe olan mezbûre Emetullah Hatun mahzarlarında ikrâr ve takrîr-i kelâm edip zevcem müteveffât-ı mezbûre için emirleriyle bi-tarîkı’l-istidâne âhardan alıverip kendüye teslîm eylediğim iki yüz yetmiş guruş ve kendüye ikrâz ve teslîm eylediğim yüz yetmiş guruş ...? da‘vâsı için emriyle sarf eylediğim yüz seksen guruş ki cem‘an altı yüz yirmi guruş hakkım olmağla meblağ-ı mezkûru terekesinden <> ve zevcem müteveffât-ı mezbûrenin hâric ez-defter terekesinden mezbûrân ketm ü ihfâ eylediler deyü iddi‘â eylediğim yüz elli guruş kıymetli üçer ayak bir çift la‘l küpeden işbu akd-i meclis olunan mülk menzilde zevcem müteveffât-ı mezbûrenin hisse-i ma‘lûmesinden nısf hisse-i ma‘lûmemi mezbûrân Osman Ağa ve Emetullah Hatun’dan taleb ve da‘vâ eylediğimde onlar dahi mûrisimiz müteveffât-ı mezbûrenin ber-mûceb-i temessük cihet-i karzdan üç yüz yetmiş beş guruş hakkı vardır deyü meblağ-ı mezbûrdan hisse-i ma‘lûmelerini benden da‘vâ etmeleriyle beynimizde münâza‘ât-ı kesîre vâkı‘a olmuşdu, el-hâletü hâzihi muslihûn tavassut edip ben da‘vâ-i mezkûremden fâriğ ve mezbûrân bana kırk dört bin akçe vermek üzerine mezbûrân Osman Ağa ve Emetullah Hatun ile beni sulh eylediklerinde ben dahi sulh-ı mezbûru kabûl ve bedel-i sulh-ı mezkûr kırk dört bin akçeyi mezbûrân yedlerinden bi’t-tamâm ahz u kabz eyledim, min-ba‘d meblağ-ı mezkûrdan yedlerinde bir akçe ve bir habbe bâkī kalmayıp müdde‘âm olan meblağ-ı mecmû‘-ı mezkûr altı yüz yirmi guruşa ve menzil-i mezbûr hissesine ve küpeye ve zevcem müteveffât-ı mezbûrenin sâir terekesine müte‘allıka âmme-i de‘âvî ve mutâlebât ve kâffe-i eymân ve muhâsamâtdan mezbûrân Osman Ağa ve Emetullah Hatun’un zimmetlerini ibrâ-i âmm-ı râfi‘ü’l-hısâm ile ibrâ ve ıskāt eyledim dedikde gıbbe’t-tasdîkı’ş-şer‘î mezbûrân Osman Ağa ve Emetullah Hatun meclis-i ma‘kūd-ı mezkûrda mezbûr el-Hâc Mahmud mahzarında her biri ikrâr ve takrîr-i kelâm edip mezbûr el-Hâc Mahmud bedel-i sulh olmak üzere medfû‘umuz olan meblağ-ı mezkûr kırk dört bin akçeye ve müdde‘âmız olan mârrü’z-zikr üç yüz yetmiş beş guruşa ve mûrisemiz müteveffât-ı mezbûrenin sâir terekesine müte‘allıka âmme-i de‘âvî ve mutâlebât ve kâffe-i eymân ve muhâsamâtdan mezbûr el-Hâc Mehmed’in zimmetini biz dahi ibrâ-i âmm-ı kātı‘ü’n-nizâ‘la ibrâ ve ıskāt eyledik dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel Molla İbrahim b. Mehmed ve el-Hâc İbrahim b. Hüseyin ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî-gurreti Receb sene 1143. Şuhûdü’l-hâl: Mehmed Efendi b. Mehmed, el-Hâc Ahmed Efendi b. Mehmed Efendi, es-Seyyid Mehmed Efendi b. el-Hâc Mustafa, Ahmed Ağa b. Mustafa, İbrahim Çelebi b. Osman, Osman Beşe b. Mehmed, Kayyim Mehmed b. Mustafa, el-Hâc Mehmed b. Veliyüddin, el-Hâc Ali b. Mehmed, el-Hâc Ebubekir b. el-Hâc Hasan, Çorbacı Süleyman Ağa b. Süleyman Efendi, Hasan Efendi b. Ahmed İmam-ı Debbâğ Yunus