Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 363 Hüküm no: 291 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed’in vefat eden kardeşinde alacağı olduğu Husûs-ı âti’l-beyanın mahâllinde istimâ‘ ve tahrîri için savb-ı şer‘-i şerîf-i enverden mezûnen Mevlânâ İbrahim Efendi b. el-Hâc Yusuf irsâl olunup ol dahi mahmiye-i İstanbul’da Yenikapı kurbünde Çukur mahâllede sâkin iken bundan akdem vefât eden Oturakçı Ali Beşe b. Mehmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun li-ebeveyn karındaşı ve şirket-i inân ile şerîkler olan bâ‘isü’l-kitâb el-Hâc Mustafa b. Mehmed meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi olmağla terekesine bi’l-verâse vâzı‘atü’l-yed ve zâtı ta‘rîf-i şer‘î ile mu‘arrefe olan Emine Hatun bt. Mustafa mahzarında üzerine da‘vâ ve takrîr-i kelâm edip ben karındaşım müteveffâ-yı mezbûr Ali Beşe ile oturakçılık ticâretinde şerîkler olup mâl-ı şirketden zimmetinde beş yüz guruş hakkım olup hattâ müteveffâ-yı mezbûr hâl-i kemâl-i sıhhatinde cihet-i mezkûreden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunup alıverilmek murâdımdır dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûre ahâlîsinden el-Hâc Ali b. el-Hâc Ali ve el-Hâc İbrahim b. Ali li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Oturakçı Ali Beşe b. Mehmed b. Abdullah hâl-i kemâl-i sıhhatinde işbu müdde‘î-i mezbûr li-ebeveyn karındaşı el-Hâc Mustafa’ya oturakçılık ticâretinde şerîkler olup mâl-ı şirketden beş yüz guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ve ma‘an mürsel İbrahim Çelebi b. Mehmed ve Mustafa Çelebi b. Hasan ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 11 min-Recebi’l-ferd sene 1143. Şuhûdü’l-hâl: el-Hâc Abdurrahman b. Hüseyin, el-Hâc Hüseyin b. Mustafa, Ahmed Ağa b. Abdullah, el-Hâc Ahmed b. Abdullah, Ebubekir Ağa b. Halil, Mustafa Çelebi b. İbrahim, el-Hâc Eyüb b. Mehmed, Mehmed Çelebi b. Ali, Abdullah Çelebi b. Ali, Ömer Çelebi b. Halil, Mehmed Çelebi b. Halil, Mehmed Çelebi b. İsmail, Yusuf Beşe b. İbrahim