Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 363 Hüküm no: 292 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Mehmed’in vefat eden babasında alacağı olduğu Kezâlik akd-i meclis-i şer‘-i şerîf ettikde müteveffâ-yı mezbûrun sulbî kebîr oğlu ve şirket-i inân ile şerîkler olan bâ‘isü’l-kitâb el-Hâc Hüseyin b. Mehmed meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi olmağla terekesine bi’l-verâse vâzı‘atü’l-yed ve zâtı ta‘rîf-i şer‘î ile mu‘arrefe olan Emine Hatun bt. Mustafa mahzarında üzerine da‘vâ ve takrîr-i kelâm edip ben babam müteveffâ-yı mezbûr Ali Beşe ile oturakçılık ticâretinde şirket-i inân vech üzere şerîkler olup mâl-ı şirketden zimmetinde beş yüz guruş hakkım olup hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunup alıverilmek matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahâlle-i mezbûre ahâlîsinden el-Hâc Ali b. Ali ve el-Hâc İbrahim b. Ali li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Oturakçı Ali Beşe b. Mehmed b. Abdullah hâl-i kemâl-i sıhhatinde işbu müdde‘î-i mezbûr sulbî oğlu el-Hâc Hüseyin’e oturakçılık ticâretinde şerîkler olmağla mâl-ı şirketden beş yüz guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi ilâ-âhırihî gıbbe’t-tahlîfi’ş-şer‘î. Fi’t-târîhi’l-mezbûr li-seneti’l-merkūme. Eş-şâhidûnü’s-sâbıkūn