Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 366 Hüküm no: 296 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un vefatıyla küçük kızı Rabia üzerine babası Memiş Beşe’nin vasi tayini Mahmiye-i İstanbul’da Tuti Latif mahâllesinde sâkine iken bundan akdem vefât eden Âişe Hatun bt. el-Hâc Ahmed’in sadriye sagīre kızı Rabia’nın babası ve velîsi olup mahmûdü’l-hâl idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir olan bâ‘isü’l-kitâb Memiş Beşe b. el-Hâc Şaban’ı hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri sagīre-i mezbûrenin vakt-i rüşd ü sedâdına varınca tesviye-i umûruna vasî nasb u ta‘yîn buyurduklarında ol dahi vesâyet-i mezbûreyi kabûl ve hizmet-i lâzımesini edâya ta‘ahhüd eyledikden sonra vasiyy-i mezbûr talebiyle hâkim-i müşârün-ileyh efendi hazretleri sagīre-i mezbûrenin vâlidesi müteveffât-ı mezbûreden müntakil mâlından beher yevm iki para nafaka ve kisve-baha farz ve takdîr buyurup meblağ-ı mefrûz-ı mezbûr yevmî iki parayı sagīre-i mezbûrenin nafaka ve kisve ve sâir levâzım-ı zarûriyesine harc u sarfa ve vakt-i hâcetde istidâneye ve lede’z-zafer sagīre-i mezbûrenin mâlına rücû‘a mezbûr Memiş Beşe’ye izin vermeğin mâ vaka‘a bi’t-taleb ketb olundu. Fî 10 Receb sene 1143. Şuhûdü’l-hâl: Halil Beşe b. Mustafa, Mustafa Çelebi b. Hasan, Ahmed Ağa b. Memiş