Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 366 Hüküm no: 295 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi reşid olduğunu ispat ettiğinden vefat eden babası Hasan Beşe’den kalan terekedeki hakkının verilmesi Mahmiye-i İstanbul’da duhânî tâifesinden olup vilâyet-i Rumeli’nde Yenice kazâsında sâkin iken bundan akdem vefât eden el-Hâc Hasan Beşe b. Abdullah’ın sulbî kebîr oğlu ve sinn ü cüssesinin bülûğa tahammülü ve bülûğuna rüşdünün inzâmını iddi‘â eden bâ‘isü’l-kitâb Mehmed Çelebi nâm şâbb-ı emred meclis-i şer‘-i şerîf-i enverde müteveffâ-yı mezbûrun mahmiye-i mezbûrede vâki‘ terekesini kabz ve veresesine îsâle bâ-hüccet-i şer‘iyye vasî ve kayyım nasb olunmağla terekesine bi’l-vesâye vâzı‘ü’l-yed eden Şehrî Mehmed Çelebi b. Mehmed mahzarında üzerine da‘vâ ve takrîr-i kelâm edip ben hâlâ âkıl ve bâliğ ve bülûğuma rüşdüm munzam olup umûrumu bi-nefsihi görmeğe kādir ve i‘ânet-i vasîden müstağnî olmağla babam müteveffâ-yı mezbûrun terekesinden bana isâbet eden on bin iki yüz dört akçeyi vasiyy-i mezbûrdan taleb ederim, suâl olunup alıverilmesi matlûbumdur dedikde gıbbe’s-suâl vasiyy-i mezbûr cevâbında mezbûr Mehmed’in hisse-i müstakillesi olan meblağ-ı mezbûra bi’l-vesâye vaz‘-ı yedini ikrâr ve müdde‘î-i mezbûrun rüşdünü inkâr edicek, müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden kazâ-i mezbûre sükkânından olup mahmiye-i mezbûrede Karaman-ı Kebîr’de vâki‘ Şekerciler Hanı’nda misâfiren sâkin es-Seyyid Hasan Çelebi b. es-Seyyid Mustafa ve İbrahim Beşe b. Mustafa li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu müdde‘î Mehmed hâlâ âkıl ve bâliğ ve bülûğuna rüşdü munzam olup umûrunu bi-nefsihi görmeğe kādir ve i‘ânet-i vasîden müstağnîdir, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ vaka‘a bi’t-taleb ketb olundu. Fi’t-târîhi’l-mezbûr li-seneti’l-merkūme. Eş-şâhidûnü’s-sâbıkūn