Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 372 Hüküm no: 300 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hüseyin’in terekenin tek varisi olan hanımı Zühre Hatun ile beytülmal emini arasında paylaşıldığı Husûs-ı âti’l-beyanın mahâllinde ketb ü tahrîri için savb-ı şer‘-i şerîf-i enverden Mevlânâ İmamzâde Halil Efendi irsâl, ol dahi mahmiye-i İstanbul’da Tavuk Pazarı kurbünde Hüseyin Ağa mahâllesinde beytülmal-ı hâssa emîni olanlara mahsûs odaya varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Kumkapı kurbünde Nişâncıpaşa mahâllesinde sâkin iken bundan akdem vefât eden el-Hâc Hüseyin b. Mehmed’in zâhirde zevce-i menkûha-i metrûkesi Zühre Hatun bt. Mehmed’den gayrı vâris-i ma‘rûfu olmayıp terekesinin rub‘u zevcesi mezbûreye ve selâse-i erbâ‘ı cânib-i beytülmala âid olmağla mahmiye-i mezbûrede bi’l-fi‘il beytülmal-ı hâssa emîni olan fahrü’l-akrân es-Seyyid Mustafa Ağa b. el-Hâc Ahmed meclis-i ma‘kūd-ı mezkûrda müteveffâ-yı mezbûrun zevce-i metrûkesi olmağla terekesine bi’l-verâse vâzı‘atü’l-yed ve zâtı ta‘rîf-i şer‘î [ile] mu‘arrefe olan bâ‘isetü’l-kitâb mezbûre Zühre Hatun mahzarında bi’l-emâne ikrâr ve takrîr-i kelâm edip müteveffâ-yı mezbûrun terekesi tahrîr ve ba‘de-ihrâci’l-masârıf ve’d-düyûn ber-mûceb-i defter-i kassâm-ı askerî cânib-i beytülmala âid olan iki bin yüz yirmi iki akçeyi tereke-i müteveffâ-yı mezbûreden olmak üzere zevce-i mezbûre Zühre Hatun bana tamâmen def‘ u teslîm, ben dahi ber-vech-i muharrer yedinden bi’l-emâne alıp kabz eyledim, min-ba‘d meblağ-ı mezbûr iki bin yüz yirmi iki akçeden zevci mezbûre Zühre Hatun yedinde ve zimmetinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ba‘dehû ma‘an irsâl [olunan] Ahmed Çelebi b. Hasan ve Veli b. Ahmed ile [67a] meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 22 min-Cemâziyelâhire sene 1143. Şuhûdü’l-hâl: Abdullah Çelebi b. Abdullah, İbrahim Efendi b. Süleyman, Hüseyin b. el-Hâc Mehmed, Ahmed b. Ali.