Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 373 Hüküm no: 301 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ayşe Hatun ve kocası Ahmed Beşe’nin mallarının vasiyetleri üzerine ne şekilde sarf edildiğini gösteren muhasebe kaydı Mahmiye-i İstanbul’da Nuri Dede mahâllesinde sâkine iken bundan akdem vefât eden Âişe Hatun bt. Abdullah’ın li-ebeveyn ammi oğlu ve zevc-i metrûkü Ahmed Beşe b. Abdullah’a münhasıra olup ba‘dehû merkūm Ahmed Beşe dahi vefât edip verâseti li-ebeveyn er karındaşı oğlu el-Hâc Ahmed b. Abdurrahman nâm gāibe münhasıra olduğu şer‘an zâhir ve mukarrer oldukdan sonra müteveffiyân-ı mezbûrân sülüs-i mâllarını vücûh-ı birr-i mu‘ayyene ve gayr-ı mu‘ayyeneye sarfa vasiyet edip tenfîze Ramazan Çavuş Ağa b. Mehmed’i vasiyy-i muhtâr ve üzerine Hüseyin Çavuş b. Abdullah nâm kimesneyi nâzır-ı muhtâr nasb u ta‘yîn eylediklerinden sonra müteveffiyân-ı mezbûrânın ber-mûceb-i defter-i kassâm-ı askerî sülüs-i mâllarından vasiyy-i mezbûrun makbûz ve masrûfunun nâzır-ı merkūm ma‘rifetiyle görülen hesâbı defteridir ki ber-vech-i âtî zikr olunur. Fî 5 min-Receb sene 1143. Müteveffiyân-ı mezbûrânın ber-mûceb-i defter-i kassâm-ı askerî menkūl terekeleri sülüslerinden vasiyy-i mezbûrun makbûzu: 16.286 akçe Minhe’l-masârıf Müteveffâ-yı mezbûr Ahmed Beşe’nin ıskāt-ı salât ve ta‘mîr-i kabrine ber-mûceb-i vasiyet masrûf 3.600 akçe Müteveffâ-yı mezbûre Âişe Hatun’un ıskāt ve ta‘mîr-i kabrine ber-mûceb-i vasiyet-i müsbete masrûf 3.600 akçe Müteveffâ-yı mezbûre Âişe Hatun’un vasiyet-i müsbetesi mûcebince berây-ı hatm-i şerîf 1.200 akçe Müteveffâ-yı mezbûr Ahmed Beşe’nin vasiyet-i müsbetesi mûcebince berây-ı hatm-i şerîf 720 akçe Müteveffâ-yı mezbûr Ahmed Beşe’nin ber-mûceb-i vasiyet-i müsbete verilen mushaf-ı şerîf 1.200 akçe Müteveffâ-yı mezbûre Âişe Hatun’un ber-mûceb-i vasiyet verilen mushaf-ı şerîf, 3 cild 3.600 akçe Müteveffâ-yı mezbûre Âişe Hatun’un mahâlle-i mezbûre câmi‘ine vasiyet eylediği seccâde semeni 600 akçe Vasiyy-i mezbûrun ma‘rifet-i şer‘le fukarâya tasadduk eylediği 1.766 akçe Yekûnü’l-masârıf: 16.286 akçe Sülüs-i merkūmdan vasiyy-i mezbûrun makbûz ve masrûfunun hesâbı görülüp vasiyy-i mezbûr yedinde bir akçe ve bir habbe bâkī kalmadığına vasiyy-i mezbûr Ramazan Çavuş Ağa tahlîf olunduğu bu mahâlle şerh verildi.