Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 403 Hüküm no: 333 Orijinal metin no: [74a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Fethi Hatun’un oğlu Ahmed’in vasisi Ahmed Çelebi’nin hesap kaydı Mahmiye-i İstanbul’da Hobyar mahâllesinde sâkine iken bundan esbak vefât eden Fethi Hatun bt. Abdullah’ın sadrî sagīr oğlu Ahmed b. Hüseyin’in li-ebeveyn ammi ve tesviye-i umûruna bâ-hüccet-i şer‘iyye vasiyy-i muhtârı Ahmed Çelebi b. el-Hâc Mehmed’in bin yüz otuz dokuz senesi Saferi’l-hayrın gurresinden târîh-i kitâba gelince sagīr-i mezbûrun hâzınesi li-eb kız karındaşı Emine Hatun binti’l-mezbûr Hüseyin taleb ve ma‘rifetiyle vasiyy-i merkūmun zikr olunan dört buçuk senede bi’l-vesâye makbûz ve masrûfunun görülen hesâbıdır ki ber-vech-i âtî zikr olunur. Fî-selhi Receb sene 1143. Kassâm-ı sâbık fazîletlü es-Seyyid Vehbi Efendi’nin imzâsıyla mümzâ ve mahtûm defter mûcebince sagīr-i mezbûrun vâlidesi Fethi Hatun’dan müntakıl vasiyy-i merkūmun makbûzu olan mâlı 13.173 akçe Müddet-i mezbûrda vasiyy-i merkūmun i‘mâliyle meblağ-ı mezbûrun içinden hâsıl vasiyy-i mezbûrun makbûzu olan 2.400 akçe Zeyl-i defter-i kassâm-ı mezbûrda müteveffât-ı mezbûrenin zimem-i nâsda olan terekesinden Hamide Hatun zimmetinde olup vasiyy-i merkūmun makbûzu olan 2.400 akçe Kezâlik zeyl-i defter-i kassâm-ı mezkûrda Yorganî Ali Çelebi zimmetinde olan yüz on guruşdan vasiyy-i merkūmun makbûzu olan, 50 guruş 6.000 akçe Zikr olunan Yorganî Ali Çelebi zimmetinde bâkī kalan altmış guruş devr-i şer‘iyye ve kefil-i melî ile tecdîd-i temessük eylediği 7.200 akçe Cem‘an yekûn: 31.173 akçe Minhâ Sagīr-i mezbûr Ahmed’in bâ-hüccet-i şer‘iyye nafaka-i mefrûzası için takdîr olunan yevmî on akçeden zikr olunan dört buçuk senede vasiyy-i merkūmun masrûfu 16.200 akçe Harc-ı hüccet-i nafaka 315 akçe Müddet-i mezbûrda ücret-i bezzâzistân 480 akçe Harc-ı muhâsebe 300 akçe Kalemiye, hüddâmiye 60 akçe Kaydiye 15 akçe Yekûn: 17.370 akçe Sahhü’l-bâkī: 13.803 akçe Meblağ-ı bâkī-i mezkûr on üç bin sekiz yüz üç akçenin yedi bin iki yüz akçesi bâlâda mezkûr Yorganî Ali Çelebi zimmetinde olup meblağ-ı bâkī altı bin altı yüz akçesi devr-i şer‘iyye ve kefil-i melî ile sagīr-i mezbûrun kız karındaşı ve hâzınesi olan mezbûre Emine Hatun’un zevci Bakkāl Mehmed Bey zimmetinde olduğu bu mahâlle şerh verildi. Fi’t-târîhi’l-mezbûr.