Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 403 Hüküm no: 332 Orijinal metin no: [74a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Vefat eden Mısırlı Mehmed Ağa’nın terekesi için vasisi Ahmed Ağa’nın İsmail Ağa’yı vekil tayin ettiği
Husûs-ı âti’l-beyanın mahâllinde ketb ü tahrîri için bi’l-iltimâs savb-ı şer‘-i enverden Mevlânâ el-Hâc İbrahim Efendi irsâl olunup ol dahi mahmiye-i İstanbul’da Hocapaşa mahâllesinde sâkin iken bundan akdem vefât eden Mısırlı Mehmed Ağa b. Abdullah’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun vesâyâsını tenfîze ve Mısr-ı Kāhire’de sâkine zevce-i menkûha-i metrûkesi Hadîce Hatun bt. Muhadim Heykel ile sulbî sagīr oğlu Ahmed’e îsâle bâ-hüccet-i şer‘iyye vasiyy-i muhtârı fahrü’l-akrân Ahmed Ağa b. Abdullah meclis-i ma‘kūd-ı mezkûrda bâ‘isü’l-kitâb İsmail Ağa b. Abdullah mahzarında bi’l-vesâye ikrâr ve takrîr-i kelâm edip bu sene-i mübârekede ben diyâr-ı âhara âzim olmağla müteveffâ-yı mezbûrun zimem-i nâsda olan hukūkunu ashâbından taleb ve da‘vâ ve ahz u kabza ve lede’l-iktizâ sulh ve ibrâya ve bunlar mütevakkıf olduğu umûrun küllîsine tarafımdan mezbûr İsmail Ağa’yı vekîl ve nâib-i menâb nasb u ta‘yîn edip ol dahi muvâcehesinde vekâlet-i mezbûreyi kabûl eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Hüseyin b. el-Hâc Mustafa ve Ahmed b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu.
Fî 15 min-Receb sene 1143.
Şuhûdü’l-hâl: Koz bekçisi fahrü’l-akrân Ebubekir Ağa b. Abdullah, Mısırlı Süleyman Çelebi b. Abdullah, Seyyid Mehmed Ağa b. Abdullah, Mısırlı el-Hâc Mustafa Ağa b. Abdullah, İbrahim Ağa b. Abdullah, el-Hâc İsmail Ağa b. ( ) el-Mübâşir, es-Seyyid Osman Ağa b. Abdullah, Kasım Ağa b. Abdullah, Hasan b. Abdullah
|