Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 405 Hüküm no: 335 Orijinal metin no: [74b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Şeyh Abdülbaki Efendi’nin bazı şahıslara borcu olduğu Husûs-ı âti’l-beyanın mahâllinde istimâ‘ ve tahrîri için savb-ı şer‘-i şerîf-i enverden mezûnen Mevlânâ Hasan Efendi b. Süleyman irsâl olunup ol dahi mahmiye-i İstanbul’da Defterdâr Ahmed Çelebi mahâllesinde sâkin es-Seyyid İbrahim Efendi b. Bahaeddin’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde habbâz tâifesinden bâ‘isü’l-vesîka Haçador v. Tekos ve Martos v. Avanis ve Mikol v. Avanis nâm zimmîler meclis-i ma‘kūd-ı mezkûrda mahmiye-i mezbûrede Şeyh Ferhad mahâllesinde sâkin iken bundan akdem vefât [eden] Şeyh Abdülbaki Efendi b. Abdullah Efendi’nin zevce-i menkûha-i metrûkesi ve evlâd-ı sıgārı Şerîf Mehmed ve Şerîf Abdullah ve Şerîfe Âişe’nin vâlideleri ve tesviye-i emrlerine cânib-i şer‘den mansûbe vasîleri olmağla terekesine bi’l-verâse ve bi’l-vesâye vâzı‘atü’l-yed ve zâtı ta‘rîf-i şer‘î ile mu‘arrefe olan Şerîfe Zeyneb Hatun bt. es-Seyyid Mehmed mahzarında her biri ikrâr ve takrîr-i kelâm edip müteveffâ-yı mezbûr Şeyh Abdülbaki Efendi b. Abdullah Efendi zimmetinde işbu yedimde olan memhûr temessük mantûkunca cihet-i karz-ı şer‘îden yüz yirmi dokuz buçuk [guruş] hakkım olup hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i mezkûreden zimmetinde bize vâcibü’l-edâ deyni olduğunu huzûr-ı Müslimînde ikrâr ve işhâd ettikden sonra meblağ-ı mezbûrun elli beş guruşunu hayâtında ahz u kabz edip zimmetinde ancak yetmiş dört buçuk guruş bâkī kalıp meblağ-ı bâkī-i mezbûru kable’l-edâ fevt olmağla terekesinden taleb ederiz, suâl olunsun dediklerinde gıbbe’s-suâl ve’l-inkâr müdde‘ûn-ı merkūmûndan ber-vech-i muharrer müdde‘âlarına beyyine taleb olundukda udûl-i ahrâr-ı ricâl-i Müslimînden mârrü’z-zikr Şeyh Ferhad mahâllesi sükkânından İbrahim Çelebi b. el-Hâc Mahmud ve Ali Çelebi b. Mustafa li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Şeyh Abdülbaki Efendi b. Abdullah Efendi b. Abdullah hâl-i kemâl-i sıhhatinde işbu müdde‘ûn-ı mersûmûn Haçador ve Martos ve Mikol zimmetinde yedlerinde olan memhûr temessük mantûkunca cihet-i karz-ı şer‘îden yüz yirmi dokuz buçuk guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle oldukdan sonra kabzlarını mu‘terif olan meblağ-ı mezbûr elli beş guruşdan mâ‘adâ yetmiş dört buçuk guruşu dahi küllen veyâ ba‘zan ahz u istîfâ veyâ hibe veyâ âhara havâle etmeyip ve mukābelesinde rehin etmeyip taraf-ı şer‘îden bir tarîk ile müteveffâ-yı mezbûrun zimmetini ibrâ etmediklerine mersûmûn Haçador ve Martos ve Mikol zimmîlere yemîn teklîf olundukda merkūmûndan her biri hasbe’l-mesûl yemîn billâhillezî enzele’l-İncîle alâ-İsa -aleyhi’s-selâm- etmeğin mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ve ma‘an irsâl olunan el-Hâc Veli b. Mehmed ve el-Hâc İbrahim b. Hüseyin ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 16 min-Receb sene 1143. Şuhûdü’l-hâl: Hasan Efendi b. Ömer, Abdullah Çelebi b. Mehmed, Mustafa Efendi b. Mehmed, el-Hâc Mehmed b. Mustafa, el-Hâc İbrahim b. Hüseyin