Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 406 Hüküm no: 336 Orijinal metin no: [74b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin hayattayken emanet verdiği kilitli sandığın oğluna verilmesi Husûs-ı âti’z-zikrin mahâllinde istimâ‘ ve tahrîri için savb-ı şer‘-i enverden mezûnen Mevlânâ Abdülbaki Efendi b. Ahmed Efendi irsâl olunup ol dahi mahmiye-i İstanbul’da Bezzâzistân-ı atik’de vâki‘ mahkemeye varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Sinan Paşa mahâllesi ahâlîsinden olup Mısr-ı Kāhire’de Kādıasker mahâllesinde misâfiren sâkin bundan akdem vefât eden Menzile kādısı Mustafa Efendi b. Abdullah’ın sulbî kebîr oğlu olduğunu iddi‘â eden işbu bâ‘isü’l-kitâb Mehmed Çelebi meclis-i ma‘kūd-ı mezkûrda Bezzâzistân müstahfızlarından el-Hâc Şahin b. Abdullah mahzarında üzerine da‘vâ ve takrîr-i kelâm edip müteveffâ-yı mezbûr Mustafa Efendi b. Abdullah b. Abdullah bin yüz yirmi dokuz senesi Rebî‘ülâhiri’nin on birinci günü müstahfız-ı mezbûr el-Hâc Şahin’e işbu mukaffel ve memhûr bir sepet sandığını alâ-tarîkı’l-emâne def‘ u teslîm, ol dahi ber-vech-i muharrer ahz u kabz edip mezbûr Mustafa Efendi bin yüz kırk bir senesi Muharremü’l-haramının gurresinde Mısr-ı Kāhire’de mârrü’z-zikr Kādıasker mahâllesinde misâfiren sâkin olduğu hâlde bi-emrillâhi te‘âlâ fevt olmağla verâseti bana ve zevce-i menkûha-i metrûkesi işbu hâzıre bi’l-meclis vâlidem Emetullah Hatun bt. Mehmed Efendi’ye münhasıra ve tashîh-i meselesi sekiz sehmden olmağla sihâm-ı mezbûrenin bir sehmi zevcesi mezbûreye ve bâkī yedi sehmi bana isâbet edip müteveffâ-yı mezbûrun terekesinde benim ile zevcesi vâlidem [75a] mezbûre Emetullah Hatun’dan gayrı vâris ve terekesine müstahakk-ı âhar olmamağla mezbûr el-Hâc Şahin yedinde olan sandığı taleb eylediğimde bana teslîmden imtinâ‘ eder, suâl olunup teslîme mezbûr el-Hâc Şahin’e tenbîh olunmak matlûbumdur dedikde gıbbe’s-suâl mezbûr el-Hâc Şahin cevâbında zikr olunan mukaffel ve memhûr sandığa bi’l-emâne vaz‘-ı yedini ikrâr lâkin mezbûr Mustafa Efendi’nin fevtini ve mezbûr Mehmed Çelebi’nin oğlu olduğunu inkâr edicek, müdde‘î-i mezbûrdan ber-vech-i muharrer müdde‘âsına beyyine taleb olundukda udûl-i ahrâr-ı ricâl-i Müslimînden zikr olunan Sinan Paşa mahâllesi ahâlîsinden olup Mısır kuzâtından el-Hâc Salih Efendi b. Abdullah ve mezbûr Mustafa Efendi’nin etbâ‘ından İbrahim Çelebi b. Mustafa li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fi’l-hakīka mahmiye-i mezbûre Sinan Paşa mahâllesi ahâlîsinden olup Menzile kādısı Mustafa Efendi b. Abdullah b. Abdullah Mısr-ı Kāhire’de Kādıasker mahâllesinde misâfiren sâkin iken bin yüz kırk bir senesi Muharremü’l-haramı gurresinde bi-emrillâhi te‘âlâ vefât edip ben namâzına hâzır olup huzûrumuzda defin olundu, müdde‘î-i mezbûr Mehmed Çelebi müteveffâ-yı mezbûrun zevce-i menkûhası işbu hâzır bi’l-meclis Emetullah Hatun’dan mütevellid ve müteveffâ-yı mezbûrun firâşından hâsıl sulbî oğludur, müteveffâ-yı mezbûrun verâseti zevce-i menkûha-i metrûkesi mezbûre Emetullah Hatun ile sulbî oğlu müdde‘î-i mezbûr Mehmed Çelebi’ye münhasıra ve tashîh-i meselesi sekiz sehmden olmağla sihâm-ı mezbûrenin bir sehmi zevcesi mezbûreye ve bâkī yedi [sehmi] oğlu müdde‘î-i mezbûra <>den gayrı vâris ve müstahakk-ı âhar olduğu ma‘lûmumuz değildir, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ve ba‘dehû ma‘an irsâl olunan Salih Çelebi b. Halil ve Mehmed Çelebi b. Hasan ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 15 min-Receb sene 1143. Şuhûdü’l-hâl: Cafer Efendi b. Abdurrahman, Bezzâzistânî el-Hâc Hüseyin b. Abdullah, el-Hâc Ali b. Abdullah, Hasan b. Ömer