Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 413 Hüküm no: 343 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi’nin vefat eden Mehmed Efendi’nin varislerinden olduğu Fi’l-asl medîne-i Diyarbekir’de el-Hâc Osman mahâllesi ahâlîsinden olup tarîk-i hacc-ı şerîfde bundan akdem vefât eden medîne-i mezbûr mukābelecisi es-Seyyid el-Hâc Mehmed Efendi b. Mahmud’un oğlunun oğlu ve usûbet-i nesebiye cihetinden ber-vech-i âtî vârisi olduğunu iddi‘â eden işbu bâ‘isü’l-kitâb es-Seyyid Ahmed Çelebi b. es-Seyyid Abdullah meclis-i şer‘-i şerîf-i enverde mahmiye-i İstanbul’da Bezzâzistân-ı atik müstahfızlarından müteveffâ-yı mezbûrun mûdi‘i olup zikri âtî meblağa bi’l-emâne vâzı‘ü’l-yed olan el-Hâc Ali b. Veliyüddin mahzarında üzerine da‘vâ ve takrîr-i kelâm edip ben müteveffâ-yı mezbûr es-Seyyid el-Hâc Mehmed Efendi b. Mahmud Edhem’in sulbî oğlu es-Seyyid Abdullah’ın firâşından hâsıl zevcesi Fâtıma bt. Abdullah’dan mütevellid sulbî oğlu olup maskat-ı re’simiz zikr olunan el-Hâc Osman mahâllesi olmağla müteveffâ-yı mezbûrun verâseti mahâlle-i mezbûrede sâkine zevce-i menkûha-i metrûkesi Âişe Hatun bt. Ömer ile sulbiye kebîre kızı Şerîfe Asiye’ye ve sulbî oğlu es-Seyyid Abdullah’ın oğlu ve usûbet-i nesebiye cihetinden bana ve âhar sulbî oğlu es-Seyyid Mustafa’nın sulbî oğlu es-Seyyid Sunullah nâm sagīre münhasıra ve tashîh-i meselesi on altı sehmden olmağla sihâm-ı mezbûrenin iki sehmi zevcesi mezbûreye ve sekiz sehmi kızı merkūmeye ve bâkī altı sehmin üçer sehmi cihet-i mezbûrdan benim ile sagīr-i mezbûr Sunullah’dan her birimize isâbet edip zikr olunan üç sehme cihet-i mezbûrdan bizden gayrı vâris ve müstahakk-ı âhar yoğiken müteveffâ-yı mezbûrun mezbûr el-Hâc Ali yedinde emânet olan ma‘lûmü’l-mikdâr meblağdan tashîh-i mezkûr üzere hisse-i ırsiyemi taleb eylediğimde bana vermede ta‘allül eder, suâl olunsun dedikde gıbbe’s-suâl mezbûr el-Hâc Ali cevâbında zikr olunan meblağ-ı ma‘lûmü’l-mikdâra bi’l-emâne vaz‘-ı yedini ikrâr ve müdde‘î-i mezbûrun ber-vech-i muharrer vâris olduğunu inkâr edicek, müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mârrü’z-zikr el-Hâc Osman mahâllesi sükkânından olup mahmiye-i mezbûrede Mahmudpaşa kurbünde Tahtahan’da misâfiren sâkin Molla Mahmud b. Hasan ve Molla Ahmed b. Fazlı li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu müdde‘î-i mezbûr es-Seyyid Ahmed Çelebi müteveffâ-yı mezbûr el-Hâc Mehmed Efendi b. Mahmud b. Edhem’in sulbî oğlu es-Seyyid Abdullah’ın firâşından hâsıl ve zevcesi Fâtıma bt. Abdullah’dan mütevellid sulbî oğlu olup maskat-ı re’sleri zikr olunan el-Hâc Osman mahâllesi olmağla müteveffâ-yı mezbûrun verâseti mahâlle-i mezbûrede sâkine zevce-i menkûha-i metrûkesi Âişe Hatun bt. Ömer ile sulbiye kebîre kızı Şerîfe Asiye’ye ve sulbî oğlu es-Seyyid Abdullah’ın oğlu ve usûbet-i nesebiye cihetinden müdde‘î-i mezbûr âhar sulbî oğlu es-Seyyid Mustafa’nın sulbî oğlu es-Seyyid Sunullah nâm sagīre münhasıra ve tashîh-i meselesi on altı sehmden olmağla sihâm-ı mezbûrenin iki sehmi zevcesi mezbûreye ve sekiz sehmi kızı merkūmeye ve bâkī altı sehmin üçer sehmi müdde‘î-i mezbûr ile sagīr-i merkūmdan her birine isâbet edip zikr olunan üç sehme cihet-i merkūmeden müdde‘î-i mezbûrdan gayrı vâris ve müstahakk-ı âhar olduğu ma‘lûmumuz değildir, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ vaka‘a bi’t-taleb ketb olundu. Fî 22 min-Recebi’l-ferd sene 1143. Şuhûdü’l-hâl: Es-Seyyid Yahya b. Abbas, Ahmed Çelebi b. Ali, Molla Mahmud b. Hasan, Mustafa Efendi b. Abdullah, el-Hâc Mustafa b. Halil, Molla Ahmed b. Ali