Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 412 Hüküm no: 342 Orijinal metin no: [76a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi’nin vefat eden Boyacı Halil’in varislerinden olduğu Mahmiye-i İstanbul’da Kepenekçi Sinan mahâllesinde sâkin iken bundan akdem vefât eden Boyacı Halil Çelebi b. el-Hâc Mehmed’in ber-vech-i âtî li-ebeveyn ammi oğlu ve usûbet-i nesebiye cihetinden vârisi olduğunu iddi‘â edip fi’l-asl vilâyet-i Anadolu’da medîne-i Kastamonu’da Kubbe mahâllesi sükkânından olup zikr olunan Kepenekçi Sinan mahâllesinde misâfiren sâkin hâfizü’l-kitâb Hâfız el-Hâc Ahmed Efendi b. Hasan Efendi meclis-i şer‘-i şerîf-i enverde müteveffâ-yı mezbûrun sulbiye sagīre kızı Hadîce’nin tesviye-i umûruna bâ-hüccet-i şer‘iyye vasiyy-i muhtârı olmağla terekesine bi’l-vesâye vaz‘-ı yed eden Osman Çelebi b. Abdullah mahzarında üzerine da‘vâ ve takrîr-i kelâm edip ben müteveffâ-yı mezbûr Boyacı Halil Çelebi b. el-Hâc Mehmed b. Hüseyin Dede’nin li-ebeveyn ammi oğlu ve usûbet-i nesebiye cihetinden vârisi olup hattâ ber-vech-i muharrer vârisi olduğumu hâlâ medîne-i mezbûr kādısı Ali Efendi b. Ali huzûrunda şuhûd-ı udûl ile isbât edip ve ba‘de’l-hükm işbu bin yüz kırk üç senesi Recebi’l-ferdinin dördüncü günü târîhiyle müverrah ve mûmâ-ileyh Ali Efendi’nin imzâ ve hatemiyle mümzâ ve mahtûm işbu hüccet-i şer‘iyyeyi yedime i‘tâ etmekle müteveffâ-yı mezbûrun verâseti zevce-i menkûha-i metrûkesi Safiye Hatun b. Abdullah’a ve sulbiye kebîre kızı Âişe Hatun’a ve sagīre kızı Hadîce’ye ve usûbet-i nesebiye cihetinden bana münhasıra olup lâkin müteveffâ-yı mezbûrun sülüs vasiyeti olmağla tashîh-i meselesi otuz altı sehmden olup sihâm-ı mezbûrenin on iki sehmi sülüs-i mezkûra ve bâkī yirmi dört sehmin üç sehmi zevce-i mezbûreye ve sekizer sehmi kızları mezbûretândan her birine ve beş sehmi bana isâbeti tahakkukundan sonra tereke-i müteveffâ-yı mezbûrdan tashîh-i mezbûr üzere hisse-i ırsiye-i şer‘iyyemi vasiyy-i mezbûr Osman Çelebi’den taleb ederim, suâl olunup alıverilmek matlûbumdur dedikde gıbbe’s-suâl vasiyy-i mezbûr cevâbında tereke-i müteveffâ-yı mezbûra bi’l-vesâye vaz‘-ı yedini ikrâr lâkin müdde‘î-i mezbûrun verâsetini ve hüccet-i merkūmenin mazmûnunu bi’l-külliye inkâr edicek, müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden fi’l-asl medîne-i mezkûr ahâlîsinden olup mahmiye-i mezbûrede Kebeciler Hanı kurbünde Çukurhan’da misâfiren sâkin es-Seyyid Himmet Çelebi b. Hüseyin ve es-Seyyid Ali Bey b. Mustafa li-ecli’ş-şehâde meclis-i şer‘-i şerîfe hâzırân olup isre’l-istişhâd fi’l-hakīka işbu müdde‘î-i mezbûr Hâfız el-Hâc Ahmed Efendi b. Hüseyin Efendi müteveffâ-yı mezbûr Boyacı Halil Çelebi b. el-Hâc Mehmed b. Hüseyin Dede’nin li-ebeveyn ammi oğlu ve usûbet-i nesebiye cihetinden vârisi olduğunu hâlâ medîne-i Kastamonu’da kādı olan Ali Efendi b. Osman huzûrunda şuhûd-ı udûl ile isbât ve verâsetine ba‘de’l-hükm işbu bin yüz kırk üç senesi Recebi’l-ferdinin dördüncü günü târîhiyle müverrah ve mûmâ-ileyh Ali Efendi’nin imzâ ve hatemiyle mümzâ ve mahtûm işbu hüccet-i şer‘iyyeyi müdde‘î-i mezbûr Hâfız el-Hâc Ahmed Efendi’nin yedine i‘tâ eyledi, biz mazmûn-ı hüccet-i merkūmeye bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ vaka‘a bi’t-taleb ketb olundu. Fî 24 min-Recebi’l-ferd sene 1143. Şuhûdü’l-hâl: el-Hâc Mustafa Çelebi b. el-Hâc Mehmed, el-Hâc İsmail b. ( ), Ahmed Çelebi b. Mehmed, Mehmed Çelebi b. Mehmed, Mustafa Çelebi b. el-Hâc Hasan, Mehmed Çelebi b. Fazlı, Ali Çelebi b. Mehmed, Salih Çelebi b. Halil