Bab Mahkemesi 54 Numaralı Sicil (H. 1102 / M. 1691) cilt: 20, sayfa: 102 Hüküm no: 74 Orijinal metin no: [12a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Hüseyin’in Hacı Mustafa b. Halil’den muhâlaa yoluyla boşanması Mahmiye-i İstanbul’da Sultanhamamı kurbunda Hoca Kasım Günânî mahallesi sâkinelerinden Ayşe bt. Hüseyin nâm hâtun ba‘de’t-ta‘rîfi’ş-şer‘î meclis-i şer‘-i şerîf-i enverde, zevc-i muhâlı‘ı işbu bâ‘isü’l-vesîka el-Hâc Mustafa b. Halil nâm kimesne mahzarında ikrâr ve takrîr-i kelâm edip, zevcim mezbûr el-Hâc Mustafa zimmetinde mütekarrir ve ma‘kūdun aleyh olan üç bin akçe mehr-i müeccelim ve nafaka-i iddet-i mu‘ayyenemden fâriğa olup, me’ûnet-i süknâm dahi kendi üzerime olup mezbûrun firâşından hâsıl ve benden mütevellid sagīr oğlum Halil’i yedi yaşına değin kendi mâlımla infâk ve iksâ etmek üzre zevcim mezbûr ile muhâla‘a-i sahîha-i şer‘iyye ile muhâla‘a edip, ol dahi hul‘-ı mezbûru kabûl eylediğinden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âm ile râfi‘ü’l-hisâm ile ibrâ ve iskāt eyledik dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, Ahmed b. Ahmed, Hüseyin b. Mustafa, diğer İbrahim Çelebi b. Mehmed, Mehmed b. Ali, Bâli b. Süleyman.