Bab Mahkemesi 54 Numaralı Sicil (H. 1102 / M. 1691) cilt: 20, sayfa: 101 Hüküm no: 73 Orijinal metin no: [11b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Manastaka v. Laskar’ın Hekimbaşı Sinan ve Destarî Hüsam vakıflarına borçlu olduğu Mahmiye-i İstanbul’da Hekim Paşa [Hekimbaşı] Sinan ve Destârî Hüsam vakıflarına mütevellî olan işbu râfi‘ü’l-kitâb İvaz Çelebi b. Abdülmennân nâm kimesne meclis-i şer‘-i şerîf-i enverde, medîne-i mezbûrede Şeyh Ferhad mahallesi sükkânından Manastaka v. Laskar nâm zimmî muvâcehesinde bi’t-tevliye üzerine da‘vâ ve takrîr-i kelâm edip, merkūm Manastaka bin doksan altı senesi Zilhiccesi’nin yirmi ikinci günü vakfeyn-i mezbûreyne bundan mukaddem mütevellî olan Osman Çelebi b. Mehmed b. [12a] Abdullah yedinden vakfeyn-i mezbûreyn mâllarından iki yüz yirmi esedî guruş istidâne ve kabz edip, deyn-i mezbûr mukābelesinde yedinde mülkü olup, mahalle-i mezbûrede vâki‘ bir tarafdan Abraham ve bir tarafdan Asvador nâm zimmîler mülkleri ve bir tarafdan Mustafa Paşa Vakfı’ndan olan odalar ve bir tarafdan tarîk-i âm ile mahdûd üç bâb fevkānî oda ve sofa ve mahzen ve su kuyusunu müştemil mülk menzilini, bi tarîki’l-istiğlâl mütevellî-i mezbûr Osman Çelebi’ye bey‘ ve teslîm eyledikden sonra mütevellî-i merkūm Osman Çelebi dahi menzil-i mezbûru ba‘de’t-tahliye ve’t-tekābuz târih-i mezbûrdan bir sene tamâmına değin yine merkūm Manastaka’ya otuz üç guruşa îcâr ve teslîm, kable’l-edâ merkūm Osman Çelebi tevliyet-i mezbûreden azl, yerine ben mütevellî olmağla, üçümüz bir meclisde iken meblağeyn-i mezbûreyn ile beni mezbûr Manastaka üzerine ihâle ve tevkîl ve her birimiz kabûl eylediğimizden sonra mezbûr Manastaka menzil-i mezbûrun bir senede ücret-i müsemmâsı olan otuz üç guruşu ve bin yüz senesi Zilhiccesi’ne gelince üç senelik ecr-i mislini vakfeyn-i mezbûreyn için bana def‘ ve teslîm, ben dahi ahz u kabz ve mesârif-i vakfeyne sarf etmişdim. El-ân menzil-i merkūm mezbûr Manastaka’nın tasarrufunda olmağla, ecr-i misli vukūf-ı tâm ı olan mahalle-i mezbûre ahâlîsinden Yusuf Çelebi b. Ahmed Beşe b. Süleyman ve el-Hâc Mehmed b. Ahmed ve Müezzin Osman Çelebi b. Ahmed’den mahallinde suâl olundukda, menzil-i mezbûrun ecr-i misli beher yevm onar akçedir deyu mezbûr Manastaka muvâcehesinde haber vermeleriyle, menzil-i mezbûrun ecr-i misli yevmî onar akçe idiği lede’ş-şer‘i’l-enver zâhir ve mukarrer olmağın, hâlen suâl olunup asl-ı mâl-ı merkūm iki yüz yirmi guruş ile bin yüz senesi Zilhiccesi’nden târih-i kitâba gelince on yedi ile ber vech-i muharrer yevmî onar akçe ecr-i mislinden müctemi‘ beş bin yüz akçeyi vakfeyn-i mezbûreyn için bana edâ ile fekk-i rehne merkūm Manastaka’ya tenbîh olunmak bi’t-tevliye matlûbumdur dedikde, gıbbe’s-suâl merkūm Manastaka cevâbında, fi’l-hakīka kaziyye bâlâda tafsîl ve beyân ve şerh ve ayân olunan vech üzre olup, asl-ı mâl-ı mezbûr iki yüz yirmi guruş ile menzil-i mezbûrun yevmî onar akçe ecr-i mislinden on yedi ile müctemi‘ olan beş bin yüz akçe vakfeyn-i mezbûreyne el-ân zimmetinde edâsı lâzım deyni olduğunu tav‘an ikrâr ve i‘tirâf etmeğin, alâ mûcebi i‘tirâfihî meblağeyn-i mezbûreyn iki yüz yirmi guruş ile beş bin yüz akçeyi vakfeyn-i mezbûreyn için mütevellî-i mezbûr İvaz Çelebi’ye edâ ile fekk-i rehne mezbûr Manastaka’ya tenbîh olunup, mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: İmâm Hüseyin Efendi, Abdullah Efendi b. Ahmed, Ahmed Bey b. Hasan, Ahmed Bey b. Osman, Mustafa Efendi b. Ali, Ömer Çelebi b. Eyüb, İbrahim Çelebi b. Mehmed.