Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 416 Hüküm no: 345 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hammamî Ahmed Ağa’nın vefatıyla varislerin terekeden haklarını aldıkları Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i enverden Mevlânâ Hasan Efendi b. Süleyman irsâl olunup ol dahi mahmiye-i İstanbul’da Ayasofya mahâllesinde sâkin iken bundan akdem vefât eden Hammâmî Ahmed Ağa b. Ali’nin menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Âişe Hatun bt. Mehmed ile sulbî kebîr oğulları Yahya Çelebi ve Abdurrahman Çelebi’ye ve sulbiye kebîre kızları Zeyneb Hatun ve Fâtıma Hatun’a münhasıra olup ba‘dehû mezbûre Zeyneb Hatun dahi vefât edip verâseti vâlidesi mezbûre Âişe Hatun ile li-ebeveyn er karındaşı mezbûr Abdurrahman’a ve li-ebeveyn kız karındaşı mezbûre Fâtıma Hatun’a münhasıra ve tashîh-i meselesi bi-hükmi’l-münâsahati’ş-şer‘iyye sekiz yüz altmış dört sehmden olup sihâm-ı mezbûrenin yüz yirmi dokuz sehmi mezbûre Âişe Hatun’a ve iki yüz elli iki sehmi mezbûr Yahya Çelebi’ye ve üç yüz yirmi iki sehmi mezbûr Abdurrahman Çelebi’ye ve yüz altmış bir sehmi mezbûre Fâtıma Hatun’a isâbeti tahakkukundan [sonra] mezbûr Yahya Çelebi meclis-i ma‘kūd-ı mezkûrda müteveffâ-yı mezbûrun terekesine bi’l-verâse vâzı‘ateyi’l-yed ve zâtları ta‘rîf-i şer‘î ile mu‘arrefeler olan bâ‘iseteyi’l-kitâb mezbûretân Âişe ve Fâtıma Hatun mahzarlarında bi’l-verâse ikrâr ve takrîr-i kelâm edip babam müteveffâ-yı mezbûrun terekesi tahrîr ve ba‘de-ihrâci’l-masârıf ber-mûceb-i defter-i kassâm-ı askerî tashîh-i mezbûr üzere hisseme isâbet eden sekiz bin yüz yirmi yedi akçe ile ba‘dehû vefât eden li-eb karındaşım mezbûr Abdurrahman’ın terekesinden dahi ber-mûceb-i defter-i kassâm mûmâ-ileyhe isâbet eden sekiz bin dört yüz kırk dört akçeden ki cem‘an on altı bin beş yüz yetmiş bir akçeyi müteveffiyân-ı mezbûrânın terekelerinden olmak üzere mezbûretân Âişe Hatun ve Fâtıma Hatun yedlerinden bi’t-tamâm ve’l-kemâl ahz u kabz eyledim, min-ba‘d meblağ-ı mezbûr on altı bin beş yüz yetmiş bir akçeden mezbûretân yedlerinde ve zimmetlerinde bir akçe ve bir habbe hakkım bâkī kalmayıp âmme-i mîrâsa müte‘allıka da‘vâdan mezbûretân Âişe ve Fâtıma Hatun’un zimmetlerini ibrâ ve ıskāt eyledim dedikde gıbbe’t-tasdîkı’ş-şer‘î mezbûretân Âişe ve Fâtıma Hatun dahi meclis-i ma‘kūd-ı mezkûrda mezbûr Yahya Çelebi mahzarında bi’l-verâse ikrâr ve takrîr-i kelâm edip zevcim müteveffâ-yı mezbûr Ahmed Ağa’nın ve kızım müteveffât-ı mezbûre Zeyneb Hatun’un terekelerinden ve ba‘dehâ vefât eden sadrî oğlum mezbûr Abdurrahman’ın terekesinden min-haysü’l-mecmû‘ bana isâbet eden sekiz bin üç yüz seksen altı akçeyi ve mezbûre Fâtıma Hatun dahi tashîh-i mezbûr üzere terekelerinden hissesine isâbet eden on yedi bin sekiz yüz altmış bir akçe terekelerinden bi’t-tamâm ve’l-kemâl ahz u kabz eyledik, ba‘de’l-yevm birbirimiz ile vechen mine’l-vücûh ve sebeben mine’l-esbâb da‘vâ ve nizâ‘ımız olmayıp husûs-ı mîrâsa ve sâire müte‘allıka her birimiz âharın zimmetini ibrâ-i âmm-ı râfi‘ü’l-hısâm ile ibrâ ve ıskāt eyledik dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ma‘an irsâl olunan el-Hâc Veli b. Mehmed ve el-Hâc İbrahim b. Hüseyin ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 8 min-Recebi’l-ferd sene 1143. Şuhûdü’l-hâl: İbrahim Bey b. Mehmed, Mehmed Ağa b. Ahmed, Hüseyin Ağa b. Mehmed, Ali Çelebi b. Mehmed, Halil Ağa b. Ahmed, el-Hâc İbrahim b. Hüseyin