Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 417 Hüküm no: 346 Orijinal metin no: [77a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un hayattayken Maksud’u azat ettiği Husûs-ı âti’l-beyanın mahâllinde istimâ‘ ve tahrîri için bi’l-iltimâs savb-ı şer‘-i enverden Mevlânâ Hacı İbrahim Efendi irsâl olunup ol dahi mahmiye-i İstanbul’da Hoca Üveys mahâllesinde sâkine iken bundan akdem vefât eden Âişe Hatun bt. Ahmed Efendi’nin menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffât-ı mezbûre rıkk-ı sâbıkını mu‘terife işbu orta boylu çatık kaşlı kara gözlü Acemiyyetü’l-asl Müslimetü’l-millet bâ‘isetü’l-kitâb Maksud bt. Abdullah meclis-i ma‘kūd-ı mezbûrda müteveffât-ı mezbûrenin zâhirde vâris-i ma‘rûfu olmayıp terekesi cânib-i beytülmala âid olmak üzere mahmiye-i mezbûrede bi’l-fi‘il beytülmalı’l-hâs emîni olup mevsûfe-i mezbûre rıkk olup terekeden olmak üzere bi’l-emâne vaz‘-ı yed ve ber-vech-i âtî husûmet ve redd-i cevâba kıbel-i şer‘den mezûn olan fahrü’l-akrân es-Seyyid Mustafa Ağa b. Hacı Ahmed mahzarında üzerine da‘vâ ve takrîr-i kelâm edip seyyidem müteveffât-ı mezbûre Âişe Hatun bt. Ahmed Efendi b. Abdullah hâl-i kemâl-i sıhhatinde fevtinden beş ay mukaddem yedinde câriye-i memlûkesi olduğum hâlde hasbeten lillâhi te‘âlâ huzûr-ı Müslimînde beni mâlından tahrîr ve i‘tâk ve zümre-i ahrâr-ı asliyâta ilhâk ve idrâc edip ben sâir ahrâr-ı asliyât gibi hürre olmuş iken emîn-i mûmâ-ileyh mâni‘ olur, suâl olunup sebîlim tahliye olunmak matlûbumdur dedikde gıbbe’s-suâl emîn-i mûmâ-ileyh cevâbında mevsûfe-i mezbûre[ye] ber-vech-i muharrer vaz‘-ı yedini ikrâr ve müdde‘iye-i mezbûrenin ber-vech-i muharrer müdde‘âsını inkâr edicek, müdde‘iye-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden mahâlle-i mezbûrede sâkin Halil Beşe b. Mehmed ve el-Hâc Hüseyin b. Nasuh li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka şahsı rü’yetimiz ile ma‘lûmumuz olan müteveffât-ı mezbûre Âişe Hatun bt. Ahmed Efendi b. Abdullah hâl-i kemâl-i sıhhatinde fevtinden beş ay mukaddem işbu müdde‘iye-i mezbûre Maksud’u yedinde câriye-i memlûkesi olduğu hâlde hasbeten lillâhi te‘âlâ huzûrumuzda mâlından tahrîr ve i‘tâk ve zümre-i ahrâr-ı asliyyete ilhâk ve idrâc edip mevsûfe-i mezbûre Maksud sâir ahrâr-ı asliyât gibi hürre olmuşdur, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr, ba‘dehû ma‘an mürsel Salih b. Halil ve diğer Salih b. Abdullah ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 22 min-Recebi’l-ferd sene [11]43. Şuhûdü’l-hâl: İbrahim Ağa b. Hacı Ahmed, Abdi Çelebi b. Mehmed berber, Ahmed b. Abdullah, Hasan b. Abdullah, Ahmed b. Mehmed