Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 419 Hüküm no: 348 Orijinal metin no: [77b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime Hatun’un vefat eden kocası Abdullah Efendi’nin terekesinden mehir alacağı olduğu Husûs-ı âti’l-beyanın mahâllinde istimâ‘ ve tahrîri için savb-ı şer‘-i şerîf-i enverden Mevlânâ Balizâde es-Seyyid Mustafa Efendi irsâl olunup ol dahi mahmiye-i İstanbul’da Neslişah? Sultân mahâllesi ahâlîsinden olup Çekmece-i Kübrâ nâibi iken düyûnu terekesinden ezyed olduğu hâlde bundan akdem vefât eden Çukur imamı Abdullah Efendi b. eş-Şeyh Ali’nin menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun zevce-i menkûha-i metrûkesi olup zâtı ta‘rîf-i şer‘î ile mu‘arrefe olan bâ‘isetü’l-kitâb Rahime Hatun bt. Ahmed Efendi meclis-i ma‘kūd-ı mezkûrda müteveffâ-yı mezbûrun terekesini kabz düyûn-ı müsbetesini edâya cânib-i şer‘den vasî ve kayyım nasb olunmağla tereke-i kāsırasına bi’l-vesâye vaz‘-ı yed eden dâmâdı Mehmed Efendi b. el-Hâc Abdullah mahzarında üzerine da‘vâ ve takrîr-i kelâm edip zevcim müteveffâ-yı mezbûr Abdullah Efendi b. eş-Şeyh Ali b. Abdurrahman zimmetinde mütekarrer ve ma‘kūdün-aleyh yirmi dört bin akçe mehr-i müeccel hakkım olup hattâ zevcim müteveffâ-yı mezbûr hâl-i kemâl-i sıhhatinde fevtinden altı sene mukaddem meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla tereke-i kāsırasından taleb ederim, suâl olunsun dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûre sükkânından es-Seyyid Mustafa Efendi b. Ali ve es-Seyyid Ahmed b. es-Seyyid Mustafa ve es-Seyyid Mehmed b. es-Seyyid Mustafa li-ecli’ş-şehâde meclis-i ma‘kūd-ı mezkûra hâzirûn olup isre’l-istişhâd fi’l-hakīka müteveffâ-yı mezbûr Abdullah Efendi b. eş-Şeyh Ali b. Abdurrahman hâl-i kemâl-i sıhhatinde fevtinden altı sene mukaddem zevcesi işbu müdde‘iye-i mezbûre Rahime Hatun’a zimmetinde mütekarrer ve ma‘kūdün-aleyh yirmi dört bin [akçe] mehr-i müeccel deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahâllinde ketb, ma‘an irsâl olunan Ali Çelebi b. Mustafa ve Salih Çelebi b. Halil ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’t-tâsi‘ aşer min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Ahmed Çavuş b. Hasan, Mehmed Çelebi b. Osman, Ahmed Çelebi b. Hüseyin, el-Hâc Yahya b. Abdullah, Salih Çelebi b. Halil