Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 418 Hüküm no: 347 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un doğacak çocuğuna Hüseyin Ağa’nın vasi tayin edildiği Mahmiye-i İstanbul’da Âşık Paşa mahâllesi ahâlîsinden olup Seddülbahr kal‘asında misâfiren sâkin iken bundan akdem vefât eden el-Hâc Hüseyin b. Hasan’ın verâseti zevce-i menkûha-i metrûkesi Emine Hatun bt. Mehmed ile babası mezbûr Hasan Beşe b. Receb’e ve vâlidesi Âişe Hatun bt. Himmet ve mezbûre Emine’nin batnında müstebîn hamle münhasıra olduğu şer‘an zâhir ve mukarrer oldukdan sonra haml-i merkūmun hisse-i mevkūfesini ahz u kabz ve zabt u hıfza kıbel-i şer‘-i enverden bir vasî ve kayyım nasbı lâzım ve mühim olmağın emânet ile ma‘rûf ve istikāmet ile mevsûf ve her vechile vesâyet uhdesinden gelmeğe kādir idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’ş-şerîf zâhir ve mukarrer olan işbu bâ‘isü’l-kitâb el-Hâc Hüseyin Ağa b. Hasan’a hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri haml-i merkūmun hisse-i mevkūfesini ahz u kabz ve zabt u hıfza vasî ve kayyım nasb u ta‘yîn buyurduklarında ol dahi vesâyet-i mezbûreyi kabûl ve merâsimini edâya ta‘ahhüd ve iltizâm etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Mehmed Ağa b. Halil, Osman Ağa b. İbrahim, Mehmed Beşe b. Himmet, Mustafa Beşe b. Hasan, el-Hâc Ahmed b. Mehmed