Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 423 Hüküm no: 352 Orijinal metin no: [78a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serdengeçti İbrahim Ağa’nın hayattayken Yusuf’u azat ettiği Husûs-ı âti’l-beyanın mahâllinde istimâ‘ ve tahrîri için bi’l-iltimâs savb-ı şer‘-i enverden Mevlânâ Mehmed Efendi b. Mehmed Efendi irsâl olunup ol dahi mahmiye-i İstanbul’da Süleymaniye Câmi‘-i şerîfi kurbünde vâki‘ Ağakapısı’nda Dergâh-ı âlî -dâme mahfûfen bi’l-meâlî- yeniçerilerinin beytülmalı emîni olanlara mahsûs odaya varıp zeyl-i vesîkada muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûra rıkk-ı sâbıkını mu‘terif kara gözlü çatık kaşlı orta boylu Acemiyyü’l-asl Müslimü’l-millet bâ‘isü’l-vesîka Yusuf b. Abdullah nâm şâbb-ı emred meclis-i ma‘kūd-ı mezbûrda Dergâh-ı âlî yeniçerilerinin doksan dokuz cemâ‘ati yoldaşlarından olup bundan akdem katîlen fevt olan Serdengeçti İbrahim Ağa b. Abdurrahman’ın terekesine bâ-fermân-ı âlî cânib-i beytülmal için bi’l-emâne vâzı‘ü’l-yed ve ber-vech-i âtî husûmet ve redd-i cevâba kıbel-i şer‘den mezûn olan hâlâ yeniçeri beytülmalı emîni fahrü’l-emâsil ve’l-akrân Ahmed Ağa b. Mustafa mahzarında üzerine da‘vâ ve takrîr-i kelâm edip ben müteveffâ-yı mezbûr İbrahim Ağa b. Abdurrahman [78b] b. Abdullah yedinde abd-i memlûkü olduğum hâlde fevtinden on beş gün mukaddem hâl-i hayâtında ve kemâl-i akl ve sıhhatinde beni mâlından tahrîr ve i‘tâk ve zümre-i ahrâr-ı asliyyîne idrâc ve ilhâk edip ben sâir ahrâr-ı asliyyîn gibi hür olmuş iken emîn-i mezbûr Ahmed Ağa rıkk olup tereke-i müteveffâ-yı mezbûrdan olmak üzere bana bi-gayrı hakkın vaz‘-ı yed eder, suâl olunup kasr-ı yedine tenbîh ve sebîlim tahliye olunmak matlûbumdur dedikde gıbbe’s-suâl emîn-i mezbûr cevâbında fi’l-vâki‘ gulâm-ı mevsûf-ı mezbûra ber-vech-i muharrer bi’l-emâne vaz‘-ı yedini ikrâr lâkin mevsûf-ı mezbûrun vech-i muharrer üzere hürriyeti ma‘lûmum değildir de[yü] inkâr edicek, mevsûf-ı mezbûrdan müdde‘âsına mutâbıka beyyine taleb olundukda udûl-i ahrâr-ı ricâl-i Müslimînden ve mahmiye-i mezbûrede Akseki mahâllesinde sâkin Ali Çelebi b. Sinan ve Abdurrahman Odabaşı b. Sinan nâm kimesneler li-ecli’ş-şehâde meclis-i ma‘kūd-ı mezbûra hâzırân olup istişhâd olunduklarında fi’l-hakīka müteveffâ-yı mezbûr Serdengeçti İbrahim Ağa b. Abdurrahman b. Abdullah hâl-i hayâtında ve kemâl-i akl ü sıhhatinde fevtinden on beş gün mukaddem işbu mevsûfe-i mezbûr Yusuf’u yedinde abd-i memlûkü olduğu hâlde bizim huzûrumuzda mâlından tahrîr ve i‘tâk ve ahrâr-ı asliyyîn zümresine idrâc ve ilhâk etmişidi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle bu mevsûf-ı mezbûr Yusuf’un hürriyetine ba‘de’l-hükm emîn-i mezbûr Ahmed Ağa kasr-ı yed eylemek üzere tenbîh ve sebîli tahliye olunup vâki‘ hâli mevlânâ-yı mezbûr mahâllinde tahrîr ve ba‘dehû ma‘an irsâl olunan ümenâ-i şer‘le meclis-i şer‘a gelip alâ-vuku‘ihî inhâ ve tahkīr etmeğin mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-şehri Recebi’l-ferd sene 1143. Şuhûdü’l-hâl: Nâzır Hasan Ağa b. Seydi, Kâtib İsmail Efendi b. Mustafa, Halil Çelebi b. Abdullah, Abdurrahman Beşe b. Mehmed