Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 424 Hüküm no: 353 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Efendi’nin Zeynep adlı küçük kızın vasisi Emine Hatun’dan aldığı parayı geri ödediği Mahmiye-i İstanbul’da Bahçekapısı kurbünde Hobyar mahâllesinde sâkin iken bundan akdem vefât eden Kuşadalı el-Hâc Hüseyin b. el-Hâc Hasan’ın sulbiye kebîre kızı olup cünûn-ı mutbık ile mecnûne Zeyneb’in üvey vâlidesi ve tesviye-i umûruna kıbel-i şer‘den mansûbe vasîsi olup zâtı ta‘rîf-i şer‘î ile mu‘arrefe olan Emine Hatun bt. Abdullah meclis-i şer‘-i şerîf-i enverde mahâlle-i mezbûre ahâlîsinden fahrü’l-akrân hâfizü’l-kitâb Tophanelizâde el-Hâc Mustafa Efendi b. Mehmed Efendi b. Abdullah tarafından ikrâr-ı âti’l-beyanı tasdîka vekîli olduğu Çavuşzâde Mehmed Efendi b. Abdullah ve Ahmed Ağa b. Abdullah şehâdetleriyle şer‘an sâbit ve mahkûmün-bih olan Halil Efendi b. Hüseyin mahzarında bi’l-vesâye ikrâr ve takrîr-i kelâm edip vasîsi olduğum mecnûne-i mezbûrenin mâlından iki yüz guruşunu bundan akdem müvekkil-i mûmâ-ileyhe bi-tarîkı’l-emâne vesâyeten def‘ u teslîm etmiş idim, el-hâletü hâzihi meblağ-ı mezbûru vekîl-i merkūm Halil Efendi işbu meclis-i şer‘de bana def‘ u teslîm, ben dahi yedinden vesâyetim hasebiyle tamâmen ahz u kabz eyledim, ba‘de’l-yevm meblağ-ı mezbûr iki yüz guruşdan müvekkil-i mûmâ-ileyh el-Hâc Mustafa Efendi yedinde ve zimmetinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 16 min-Recebi’l-ferd sene 1143. Şuhûdü’l-hâl: Hüseyin Ağa b. Mehmed, Seyyid Yahya Çelebi b. İbrahim, el-Hâc İbrahim b. Hüseyin, Mehmed Efendi b. Osman, Seyyid Mustafa b. Mehmed