Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 427 Hüküm no: 355 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdurrahman’ın ortağı Mehmed vefat ettiğinden ortaklıktaki (inan) parasını terekeden alması Husûs-ı âti’l-beyanın mahâllinde istimâ‘ ve tahrîri iltimâs olunmağın savb-ı şer‘-i şerîf-i enverden mezûnen Mevlânâ es-Seyyid Yahya Efendi irsâl olunup ol dahi mahmiye-i İstanbul’da Yemiş İskelesi’nde kuruyemiş tüccârından el-Hâc Mustafa b. Mehmed’in mahzen odasına varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde tüccâr-ı mezkûreden olup mahmiye-i mezbûrede Üskübî mahâllesinde sâkin iken bundan akdem vefât eden el-Hâc Mehmed b. el-Hâc Abdullah’ın ber-vech-i âtî şerîki olduğunu iddi‘â eden bâ‘isü’l-kitâb el-Hâc Abdurrahman b. Musa meclis-i ma‘kūd-ı mezkûrda müteveffâ-yı mezbûrun dâmâdı ve evlâd-ı sıgārı Abdullah ve Âişe ve Zeyneb’in tesviye-i emrlerine kıbel-i şer‘den mansûb vasîleri olmağla terekesine bi’l-vesâye vâzı‘ü’l-yed olan Hasan Hoca b. Abdullah mahzarında üzerine da‘vâ ve takrîr-i kelâm edip işbu yedimde olan mu‘anven ve mersûm şirket temessükü mûcebince bin yüz kırk üç senesi Muharremü’l-haramı gurresinde müteveffâ-yı mezbûr el-Hâc Mehmed b. el-Hâc Abdullah b. el-Hâc Abdullah mâlından bin guruş ve ben dahi mâlımdan bin guruş ifrâz ve birbirine halt edip ve fâide beynimizde nısfiyet üzere olmak şartıyla kuruyemiş ticâretinde huzûr-ı Müslimînde akd-i şirket-i inân ve meblağ-ı mecmû‘-ı mezkûr iki bin guruşu mezbûr el-Hâc Mehmed ahz u kabz edip akd-i şirket beynimizde kāim iken vefât etmekle re’sü’l-mâlım olan bin guruşu terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mezbûr el-Hâc Mustafa b. Mehmed ve diğer el-Hâc Mustafa b. el-Hâc Ali li-ecli’ş-şehâde meclis-i ma‘kūd-ı mezkûra hâzırân [olup] isre’l-istişhâd fi’l-hakīka işbu müdde‘î-i mezbûr el-Hâc Abdurrahman’ın yedinde olan mu‘anven ve mersûm şirket temessükü mûcebince bin yüz kırk üç senesi Muharremü’l-haramı gurresinde müteveffâ-yı mezbûr el-Hâc Mehmed b. el-Hâc Abdullah b. Abdullah mâlından bin guruş ve müdde‘î-i merkūm dahi mâlından bin guruş ifrâz ve birbirine halt edip ve fâide beynlerinde nısfiyet üzere olmak şartıyla kuruyemiş ticâretinde huzûrumuzda akd-i şirket-i inân ve meblağ-ı mecmû‘-ı mezkûr iki bin guruşu mezbûr el-Hâc Mehmed ahz u kabz edip akd-i şirket beynlerinde kāim iken vefât eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ve ba‘dehû ma‘an irsâl olunan el-Hâc İbrahim b. Hüseyin ve el-Hâc Mehmed b. Ahmed ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî-gurreti Şa‘bân sene 1143. Şuhûdü’l-hâl: Es-Seyyid el-Hâc Mehmed Ağa b. Nurullah, Ali Odabaşı b. el-Hâc Abdullah, el-Hâc Süleyman b. Ahmed, el-Hâc Ömer b. Abdullah, Mustafa Çelebi b. el-Hâc Musa, Süleyman Çavuş b. Mustafa, Mehmed Yazıcı b. Ömer, es-Seyyid Hasan b. Ali, Abdullah Çelebi b. Mehmed, Abdullah Ağa b. Hüseyin