Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 428 Hüküm no: 356 Orijinal metin no: [79a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Nurullah’ın ortağı Mehmed b. Abdullah vefat ettiğinden ortaklıktaki (inan) parasını terekeden alması Kezâlik akd-i meclis-i şer‘-i şerîf ettikde tüccâr-ı mezkûrdan olup mahmiye-i mezbûrede Üskübî mahâllesinde sâkin iken bundan akdem vefât eden el-Hâc Mehmed b. el-Hâc Abdullah’ın ber-vech-i âtî şerîki olduğunu iddi‘â eden bâ‘isü’l-kitâb es-Seyyid el-Hâc Mehmed b. Nurullah meclis-i ma‘kūd-ı mezkûrda müteveffâ-yı mezbûrun dâmâdı ve evlâd-ı sıgārı Abdullah ve Âişe’nin ve Zeyneb’in tesviye-i emrlerine kıbel-i şer‘den mansûb vasîleri olmağla terekesine bi’l-vesâye vâzı‘ü’l-yed olan Hasan Hoca b. Abdullah mahzarında üzerlerine da‘vâ ve takrîr-i kelâm edip işbu yedimde olan mu‘anven ve mersûm şirket temessükü mûcebince bin yüz kırk üç senesi Muharremü’l-haramı gurresinde mezbûr el-Hâc Mehmed b. el-Hâc Abdullah b. Abdullah mâlından beş yüz guruş ve ben dahi mâlımdan beş yüz guruş ifrâz ve birbirine halt edip ve fâide beynimizde nısfiyet üzere olmak şartıyla kuruyemiş ticâretinde huzûr-ı Müslimînde akd-i şirket-i inân ve meblağ-ı mecmû‘-ı mezkûr bin guruşu mezbûr el-Hâc Mehmed ahz u kabz edip akd-i şirket [79b] beynimizde kāim iken vefât etmekle re’sü’l-mâlım olan beş yüz guruşu terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mezbûr el-Hâc Mustafa b. Mehmed ve diğer el-Hâc Mustafa b. el-Hâc Ali li-ecli’ş-şehâde meclis-i ma‘kūd-ı mezkûrda hâzırân olup isre’l-istişhâd fi’l-hakīka işbu müdde‘î-i mezbûr es-Seyyid el-Hâc Mehmed’in yedinde olan mu‘anven ve mersûm şirket temessükü mûcebince bin yüz kırk üç senesi Muharremü’l-haramı gurresinde müteveffâ-yı mezbûr el-Hâc Mehmed b. el-Hâc Abdullah b. Abdullah mâlından beş yüz guruş ve müdde‘î-i merkūm dahi mâlından beş yüz guruş ifrâz ve birbirine halt edip ve fâide beynlerinde nısfiyet üzere olmak şartıyla kuruyemiş ticâretinde huzûrumuzda akd-i şirket-i inân ve meblağ-ı mecmû‘-ı mezkûr bin guruşu mezbûr el-Hâc Mehmed ahz u kabz edip akd-i şirket beynlerinde kāim iken vefât eyledi ilâ-âhırihî gıbbe’t-tahlîfi’ş-şer‘î mûcebiyle ba‘de’l-hükm. Fi’t-târîhi’l-mezbûr li-seneti’l-merkūme. Eş-şuhûdûnü’s-sâbıkūn