Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 447 Hüküm no: 376 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsak v. Avram’ın vefat eden Bosnavi Mehmed Efendi’deki alacağı konusundaki davaya sulh bedeli karşılığı son verildiği Mahmiye-i İstanbul’da Vâlide Hanı tüccârından bazergân tâifesinden işbu bâ‘isü’s-sifr İsak v. Avram nâm Yahûdî meclis-i şer‘-i şerîf-i enverde mahmiye-i mezbûrede Kabasakal mahâllesinde sâkin iken bundan akdem vedâ‘-ı âlem-i fânî eden başmuhâsebeci merhûm Bosnavî el-Hâc Mehmed Efendi b. Zülfikar’ın zevce-i metrûkesi ve sulbî sagīr oğlu Salih Ağa’nın üvey vâlidesi ve tesviye-i umûruna kıbel-i şer‘den mansûbe vasiyyesi olmağla terekesine bi’l-verâse ve bi’l-vesâye vâzı‘atü’l-yed olan Saraylı Bahtiyar Hatun bt. Abdullah ile merhûm-ı mezbûrun sulbiye kebîre kızı Âişe Hatun taraflarından husûs-ı âti’l-beyanda vekîlleri olduğu zât-ı mezbûretânı ma‘rifet-i şer‘iyye ile ârifân merhûm-ı mezbûrun etbâ‘ından Hasan Bey b. Halil ve Kahveci Ahmed Çelebi b. Mustafa şehâdetleriyle mahzar-ı hasm-ı câhidde şer‘an sâbit ve sübût-ı vekâletine hükm olunan Kâtib Mustafa Efendi b. el-Hâc Mehmed mahzarında üzerine da‘vâ ve takrîr-i kelâm edip merhûm başmuhâsebeci Bosnavî el-Hâc Mehmed Efendi b. Zülfikar b. Abdullah zimmetinde işbu yedimde olan bin yüz kırk iki senesi Zilka‘de’sinin onuncu günü târîhiyle müverrah mümzâ ve mahtûm temessük mûcebince cihet-i karz-ı şer‘îden iki bin beş yüz guruş ve yedimde olan memhûr tezkireler mûcebince dahi yedimden müşterâ ve makbûz çuka ve kumaş ve kesme bahalarından ba‘de-külli’l-hesâb beş yüz guruş ki cem‘an üç bin guruş hakkım olup hattâ merhûm-ı mezbûr hâl-i kemâl-i sıhhatinde meblağ-ı mecmû‘-ı mezbûr ciheteyn-i merkūmeteynden zimmetinde bana [vâcib]ü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mesfûrdan müdde‘âsını mübeyyin beyyine taleb olundukda udûl-i ahrâr-ı ricâl-i Müslimînden şâhidân-ı mezbûrân Hasan Bey ve Kahveci Ahmed Çelebi li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka merhûm-ı mezbûr başmuhâsebeci Bosnavî el-Hâc Mehmed Efendi b. Zülfikar b. Abdullah hâl-i kemâl-i sıhhatinde işbu müdde‘î-i mesfûr bazergân İsak Yahûdî’ye yedinde olan târîh-i mezbûr ile müverrah mümzâ ve mahtûm temessük mûcebince cihet-i karz-ı şer‘îden iki bin beş yüz guruş ve yedinde olan memhûr tezkireler mûcebince yedinden müşterâ ve makbûz çuka ve kumaş ve kesme bahalarından dahi ba‘de-külli’l-hesâb beş yüz guruş ki cem‘an ciheteyn-i merkūmeteynden üç bin guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’l-mu‘teber mûcebiyle ba‘de’l-hükm mesfûr İsak Yahûdî yine meclis-i ma‘kūd-ı mezkûrda vekîl-i merkūm Kâtib Mustafa Efendi muvâcehesinde ikrâr ve takrîr-i kelâm edip merhûm-ı mezbûr Bosnavî el-Hâc Mehmed Efendi hayâtında taht-ı iltizâmında olan Menteşe sancağında Milas kazâsının Duhân Dönümü Mukāta‘ası ile Kocaeli kazâsının Duhân Dönümü Mukāta‘ası’nı bin yüz kırk üç senesi rûz-ı Hızırı ibtidâsından bir sene tamâmına değin zabt etmek üzere bana altı bin beş yüz guruşa ilzâm, ben dahi iltizâm [84a] ve kabûl edip meblağ-ı mezbûrun beş bin otuz dört buçuk guruşunu merhûm-ı mezbûr hayâtında yedine ber-vech-i peşîn def‘ u teslîm, ol dahi ahz u kabz edip zikr olunan mukāta‘aları ben zabt etmeden mezbûr Bosnavî el-Hâc Mehmed Efendi vefât etmekle medfû‘um olan meblağ-ı mezbûr beş bin otuz dört buçuk guruşu dahi merhûm-ı mezbûrun terekesinden olmak üzere vekîl-i merkūmdan taleb ve da‘vâ eylediğimde vekîl-i merkūm dahi merhûm-ı mezbûrun hayâtında sen bazergânı olmağla merhûm-ı mezbûr yedinden bilâ-devr ribh olmak üzere on beş bin guruşu bi-gayrı hakkın ahz u kabz eyledin deyü bi’l-vekâle benden taleb ve da‘vâ eylediğinde ben dahi inkâr etmekle beynimizde münâza‘ât-ı kesîre vâkı‘a olmuş idi, el-hâletü hâzihi beynimize muslihûn tavassut edip da‘vâ-i mezbûrelerimizden her birimiz fâriğ olup mukāta‘a bedeli olmak üzere medfû‘um olup iddi‘â eylediğim meblağ-ı mezbûr beş bin otuz dört buçuk guruşa merhûm-ı mezbûr ile hayâtında hîn-i fevtine gelince beynimizde cereyân eden ahz ü i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allıka âmme-i de‘âvî ve mutâlebât ve eymân ve muhâsamâtdan vekîl-i mezbûr ile müvekkiletân-ı mezbûretân Saraylı Bahtiyar Hatun ve Âişe Hatun’un ve sagīr-i merkūm Salih Efendi’nin zimmetlerini ibrâ-i âmm-ı kātı‘ü’n-nizâ‘la ibrâ ve ıskāt eyledim ve vekîl-i merhûm Mustafa Efendi dahi bilâ-devr ribh olmak üzere benden iddi‘â eylediği meblağ-ı mezbûr on beş bin guruşa ve merhûm-ı mezbûr ile hayâtında hîn-i fevtine gelince beynimizde cârî ahz ü i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allıka âmme-i de‘âvî ve mutâlebât ve eymân ve muhâsamâtdan benim zimmetimi bi’l-vekâle ibrâ-i âmm-ı kātı‘ü’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 7 min-Şa‘bân sene 1143. Şuhûdü’l-hâl: Bakkāl el-Hâc Halil, Ahmed Çelebi b. İsmail muhzır, Ahmed Çelebi b. Hasan, Belgradî Veli Çavuş Ağa, Mehmed Beşe b. Mustafa sâkin-i Yeniçeşme, el-Hâc Mehmed Ağa b. Ali, el-Hâc Mehmed Ağa b. Musa, Hasan Ağa, Ağa-yı sadr-ı âlî, Hasan Bey b. Halil, Ahmed Çelebi b. Mustafa, Ali Çelebi b. İbrahim