Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 445 Hüküm no: 375 Orijinal metin no: [83a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Bey’in, Basra’da misafir olarak bulunan Ahmed Bey’in vekili olduğu Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden mezûnen Mevlânâ Burusî Mehmed Efendi irsâl olunup ol dahi mahmiye-i İstanbul’da Küçük Ayasofya kurbünde Hüseyin Ağa mahâllesinde sâkin Ahmed Çelebi b. Ali’nin menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde hâlâ medîne-i Basra’da misâfiren sâkin Ahmed Bey b. Osman b. Abdullah tarafından ber-vech-i âtî vekâlet iddi‘â eden bâ‘isü’l-kitâb Osman Bey b. Abdullah meclis-i ma‘kūd-ı mezkûrda mahmiye-i mezbûrede vâki‘ Dergâh-ı [âlî] cebecilerinin beytülmallarını kabza memûr olmağla zikri âtî eşyâya bi’l-emâne vâzı‘ü’l-yed olan fahrü’l-akrân Yusuf Ağa b. Mehmed mahzarında üzerine da‘vâ ve takrîr-i kelâm edip müvekkilim mezbûr Ahmed Bey cebehânede sâkin iken bundan akdem vefât eden Cebeci Hasan Beşe b. Abdullah’a hayâtında eşyâ-i memlûkesinden işbu mu‘âyene olunan bir güvezî şal kuşak ve bir neftî hâre kaftan ve bir güvezî çuka dolama ve iki kutnî anteri ve bir çuka çakşır ve bir fitilli sâde ve tahmînen beş dirhem ûdunu alâ-tarîkı’l-emâne îdâ‘ ve teslîm, ol dahi ber-vech-i muharrer ahz u kabz etmekle [83b] eşyâ-i mezkûreyi emîn-i mezbûrdan taleb ve da‘vâ ve ahz [ü] kabza ve kendüye îsâle huzûr-ı Müslimînde tarafından beni vekîl ve nâib-i menâb nasb u ta‘yîn ettikde ben dahi muvâcehesinde vekâlet-i mezbûreyi ba‘de’l-kabûl mezbûr Hasan Beşe bilâ-vâris vefât etmekle emîn-i mezbûr eşyâ-i mezkûreyi müteveffâ-yı mezbûrun terekesinden olmak zu‘muyla bi-gayrı hakkın vaz‘-ı yed eder, suâl olunup alıverilmek matlûbumdur dedikde gıbbe’s-suâl emîn-i mezbûr Yusuf Ağa cevâbında fi’l-vâki‘ eşyâ-i mezkûreye vaz‘-ı yedini ikrâr lâkin müdde‘î-i mezbûrun ber-vech-i muharrer müdde‘âsını inkâr edicek, müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden Mustafa Bey b. Ali ve Receb Bey b. Abdullah li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müvekkil-i mezbûr Ahmed Bey b. Osman b. Abdullah müteveffâ-yı mezbûr Cebeci Hasan Beşe’ye hayâtında eşyâ-i memlûkesinden işbu mu‘âyene olunan bir güvezî şal kuşak ve bir hâre neftî kaftan ve bir güvezî çuka dolama ve iki kutnî anteri ve bir çuka çakşır ve bir fitilli sâde ve tahmînen beş dirhem ûdunu alâ-tarîkı’l-emâne îdâ‘ ve teslîm, ol dahi ber-vech-i muharrer ahz u kabz etmekle eşyâ-i mezkûre müvekkil-i mezbûr Ahmed Bey’in mülkü olup ve eşyâ-i mezkûreyi vaz‘-ı yed eden emîn-i mezbûrdan taleb ve da‘vâ ve ahz u kabz ve kendüye îsâle tarafından işbu müdde‘î-i mezbûr Osman Bey’i huzûrumuzda vekîl ve nâib-i menâb nasb u ta‘yîn ettikde ol dahi ber-vech-i muharrer vekâlet-i mezbûreyi kabûl eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mevkūfen alâ-yemîni’l-müvekkil mûcebiyle ba‘de’l-hükm vekîl-i mezbûr Osman Bey meclis-i ma‘kūd-ı mezkûrda emîn-i mezbûr Yusuf Ağa muvâcehesinde bi’l-vekâle ikrâr ve takrîr-i kelâm edip zikr olunan eşyâyı bi-a‘yânihâ emîn-i mezbûr Yusuf Ağa işbu meclis-i ma‘kūdda bana tamâmen def‘ u teslîm, ben dahi vekâletim hasebiyle yedinden bi’t-tamâm ve’l-kemâl alıp kabz eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Ahmed Çelebi b. İsmail ve Ali Çelebi b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 27 min-Recebi’l-ferd sene 1143. Şuhûdü’l-hâl: Mustafa Ağa b. Ahmed, Ömer Ağa b. Ebubekir, Salih Ağa b. Mustafa, Mehmed Ağa b. Hasan, Numan b. Ahmed, Hasan Çelebi b. Abdullah