Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 468 Hüküm no: 396 Orijinal metin no: [88b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Efendi’nin, Hatice’nin vasisi ve babası olan Ali Ağa’dan borç para aldığı Husûs-ı âti’l-beyanın mahâllinde ketb ü tahrîri için savb-ı şer‘-i enverden bi’t-taleb Mevlânâ Sadi Ali Efendi irsâl olunup ol dahi mahmiye-i İstanbul’da Bahçekapısı kurbünde Hobyar mahâllesinde umdetü erbâbi’t-tahrîr ve’l-kalem zübdetü ashâbi’t-tastîr ve’r-rakam hâlâ şehremini olan el-Hâc İsmail Efendi b. el-Hâc Mehmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mûmâ-ileyh el-Hâc İsmail Efendi meclis-i ma‘kūd-ı mezbûrda mahâlle-i mezbûrede sâkine iken bundan akdem vefât eden kayınvâlide[si] merhûme Hâce Hadîce Hanım bt. Çalık Mehmed Ağa’nın sadriye sagīre kızı Âişe Hanım’ın ve babası ve velîsi ve tesviye-i umûruna kıbel-i şer‘den mansûb vasîsi olan fahrü’l-a‘yân işbu hâfizü’l-kitâb el-Hâc Ali Ağa b. Abdullah mahzarında ikrâr ve takrîr-i kelâm edip vasiyy-i mezbûr el-Hâc Ali Ağa kızı sagīre-i mezbûre Âişe Hanım’ın mâlından olmak üzere nakid bin iki yüz elli guruşu bana idâne ve teslîm, ben dahi yedinden istidâne ve kabz ve kabûl edip semeni târîh-i kitâbdan bir sene tamâmına değin müeccel ve mev‘ûd kezâlik sagīre-i mezbûrenin mâlından olmak üzere vasiyy-i mezbûr el-Hâc Ali Ağa yedinden iştirâ ve kabz eylediğim bir kıt‘a mushaf-ı şerîf hediyesi olan yüz seksen yedi buçuk guruş ki cem‘an bin dört yüz otuz yedi buçuk guruş zimmetimde sagīre-i mezbûre Âişe Hanım’a vâcibü’l-edâ ve lâzımü’l-kazâ deynimdir dedikde gıbbe’t-tasdîkı’ş-şer‘î mûmâ-ileyh el-Hâc İsmail Efendi’nin halîle-i celîlesi olup zâtı ta‘rîf-i şer‘î ile mu‘arrefe olan fahrü’l-muhadderât Rabia Hanım bt. Yusuf Ağa ile mahmiye-i mezbûrede Tarsus mahâllesinde sâkin el-Hâc İbrahim Ağa b. Mehmed dahi meclis-i mezbûrda vasiyy-i merkūm mahzarında her biri ikrâr ve takrîr-i kelâm edip mûmâ-ileyh el-Hâc İsmail Efendi zimmetinde olan meblağ-ı mecmû‘-ı mezbûr bin dört yüz otuz yedi buçuk guruşa tarafından emr ü kabûlü hâvî kefâlet-i sahîha-i şer‘iyye ile biz dahi kefil bi’l-mâl ve zâmin olduk dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr, ba‘dehû ma‘an irsâl olunan Yunus Efendi b. Mehmed ve Ali Çelebi b. İbrahim ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî aşer min-Recebi’l-ferd sene 1143. Şuhûdü’l-hâl: Mehmed Ağa b. İsmail Efendi, eş-Şeyh Abdurrahim Efendi, Musa Çelebi b. Mustafa, Hüseyin Çelebi b. Abdullah, Bezzâzistânî Mustafa b. Ali, Yunus Efendi b. Mehmed, Ali Çelebi b. İbrahim, Hasan b. Abdullah