Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 468 Hüküm no: 395 Orijinal metin no: [88a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin çocuklarına verilen nafaka yetmediğinden yeniden nafaka takdir edildiği Mahmiye-i İstanbul’da Saraç İshak mahâllesi ahâlîsinden sâbıkā rûznâmçe-i evvel olup medîne-i Tebriz’de misâfiren sâkin iken bundan akdem irtihâl-i dâr-ı bekā eden merhûm Mustafa Efendi b. Mehmed’in sulbî sagīr oğulları Abdullah Bey ve Feyzullah Bey ve sulbiye sagīre kızı Rukıye Hanım’ın vâlideleri ve tesviye-i emrlerine kıbel-i şer‘den mansûb vasiyyeleri olan umdetü’l-muhadderât işbu sâhibetü’l-kitâb Emetullah Hanım bt. el-merhûm İbrahim Ağa talebiyle sagīrân-ı mezbûrân Abdullah Bey ve Feyzullah Bey’e mukaddemâ bâ-hüccet-i şer‘iyye farz ve takdîr olunan her birine yevmî ellişer akçe ve sagīre-i mezbûre Rukıye’ye dahi farz ve takdîr olunan yevmî otuz akçe kifâyet etmeyip ve mâllarında müsâ‘ade olmağla sagīrân-ı mezbûrân Abdullah Bey ve Feyzullah Bey’e târîh-i kitâbdan mâl-i müntakillerinden her birine yevmî onar akçe ve sagīre-i mezbûre Rukıye Hanım’a dahi târîh-i kitâbdan mâl-ı müntakilinden yevmî otuz akçe nafaka ve kisve-baha zam ve ilhâk olunup cem‘an sıgār-ı mezbûrûndan her birine yevmî altmışar akçe cem‘an yevmî [yüz] seksen akçe nafaka ve kisve-baha farz ve takdîr olunup meblağ-ı mecmû‘-ı mezbûr yevmî yüz seksen akçeyi sıgār-ı mezbûrûn Abdullah Bey ve Feyzullah Bey ve Rukıye Hanım’ın hâdimeleriyle nafaka ve kisve-baha ve sâir levâzım-ı zarûriyelerine harc u sarfa ve vakt-i hâcetde istidâneye ve lede’z-zafer mâllarına rücû‘a vasiyye-i mûmâ-ileyhâ Emetullah Hanım’a izin birle mâ vaka‘a bi’t-taleb ketb olundu. Fî-gurreti Şa‘bân sene 1143. Şuhûdü’l-hâl: Âtıf Efendi Mektûbî-i müderris, Saim İbrahim Efendi Müderris, Yeğen Mustafa Ağa b. Mehmed, Ahmed Ağa b. Mehmed hazînedâr, Ali Çelebi b. Mehmed