Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 474 Hüküm no: 401 Orijinal metin no: [89b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Efendi’nin hem kendisinin hem de annesinin terekedeki hakkını Ahmed Efendi’den tamamen aldığı Kezâlik akd-i meclis-i şer‘-i şerîf ettikde mahâlle-i mezbûrede sâkine iken bundan akdem vefât eden Emine Hatun bt. Ali Efendi’nin verâseti zevc-i metrûkü mezbûr Ahmed Efendi ile sadriye sagīre kızı Âişe’ye ve vâlidesi Hadîce Hatun bt. Abdullah’a ve li-ebeveyn er karındaşı Halil Efendi’ye münhasıra ve tashîh-i meselesi on iki sehmden olup sihâm-ı mezbûrenin üç sehmi mezbûr Ahmed Efendi’ye ve altı sehmi sagīre-i mezbûreye ve iki sehmi vâlidesi mezbûre Hadîce Hatun’a ve bir sehmi mezbûr Ahmed Efendi’ye isâbeti tahakkukundan sonra mezbûre Hadîce Hatun bt. Abdullah b. Abdullah’ın sadrî kebîr oğlu ve tarafından husûs-ı âti’l-beyanda vekîli olduğu zât-ı mezbûreyi ma‘rifet-i şer‘iyye ile ârifân Mustafa Çelebi b. Mehmed ve Ahmed Çelebi b. Hasan şehâdetleriyle mahzar-ı hasm-ı câhidde sâbit ve sübût-ı vekâletine hükm-i şer‘î lâhık olan mezbûr Halil Efendi meclis-i ma‘kūd-ı mezbûrda müteveffât-ı mezbûrenin zevc-i metrûkü olmağla terekesine bi’l-verâse vâzı‘ü’l-yed olan bâ‘isü’l-kitâb mezbûr Ahmed Efendi mahzarında bi’l-asâle ve bi’l-vekâle ikrâr ve takrîr-i kelâm edip mûrisemiz müteveffât-ı mezbûre Emine Hatun’un terekesi tahrîr ve ba‘de-ihrâci’l-masârıf ber-mûceb-i defter-i kassâm-ı askerî tashîh-i mezbûr üzere vâlidem müvekkile-i mezbûre Hadîce Hatun’un südüs hissesine isâbet eden elli bir bin dört yüz yetmiş akçe ile benim hisseme isâbet eden yirmi beş bin yedi yüz otuz yedi akçe ki cem‘an [yetmiş] yedi bin iki yüz dokuz akçeyi tereke-i müteveffât-ı mezbûreden olmak üzere mezbûr Ahmed Efendi bana tamâmen def‘ ve teslîm, ben dahi yedinden ahz u kabz eyledim, ba‘de’l-yevm mûrisemiz müteveffât-ı mezbûre Emine Hatun’un terekesinden hissemize isâbet eden meblağ-ı mecmû‘-ı mezbûr yetmiş yedi bin iki yüz dokuz akçeden mezbûr Ahmed Efendi yedinde ve zimmetinde bir akçe ve bir habbe hakkımız bâkī kalmayıp husûs-ı mezbûra müte‘allıka âmme-i de‘âvî ve kâffe-i mutâlebât ve eymân ve muhâsamâtdan mezbûr Ahmed Efendi’nin zimmetini bi’l-vesâye ve bi’l-vekâle ibrâ-i âmm-ı kātı‘ü’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î vâki‘ hâli ilâ-âhırihî. Fî 17 min-Recebi’l-ferd sene 1143. Şuhûdü’l-hâl: Mehmed Efendi b. Yusuf, el-Hâc Mehmed Efendi b. Mustafa, Ahmed Çelebi b. Mehmed, Mustafa Çelebi b. Mehmed, Ahmed Çelebi b. Abdullah, Ahmed Çelebi b. Hasan, Mustafa Çelebi b. Mehmed Efendi