Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 473 Hüküm no: 400 Orijinal metin no: [89b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi ve kızı Ayşe’nin evdeki hisselerini Halil Efendi’ye sattıkları Kezâlik isâbeti tahakkukundan sonra sagīre-i mezbûrenin babası ve velîsi ve tesviye-i umûruna kıbel-i şer‘den mansûb vasîsi olan mezbûr Ahmed Efendi meclis-i ma‘kūd-ı mezkûrda müteveffâ-yı mezbûrun sulbî kebîr oğlu işbu bâ‘isü’l-kitâb mezbûr Halil Efendi mahzarında bi’l-asâle ve bi’l-vesâye ikrâr ve takrîr-i kelâm edip müteveffâ-yı evvel-i mezbûr Ali Efendi’nin ile’l-vefât yedinde mülk ve hakkı idiği müsbet olup mârrü’z-zikr Kâtib Hüsrev mahâllesinde vâki‘ bir tarafdan ba‘zan diğer Ahmed Efendi ve ba‘zan Âşık Paşa Câmi‘-i şerîfi müezzini Mehmed Efendi menzilleri ve bir tarafdan ba‘zan Mustafa Beşe ve ba‘zan Ümmühani Hatun menzilleri ve bir tarafdan ba‘zan diğer Emine Hatun ve ba‘zan Salih Ağa menzilleri ve bir tarafdan tarîk-i hâs ile mahdûd hâriciyede fevkānî üç oda ve bir kenîf ve tahtânî bir ahır ve dâhiliyede fevkānî üç bâb oda ve vustâda üç bâb oda ve bir kilâr ve bir matbâh ve bir gasilhâne ve bir mikdâr bağçe ve eşcâr-ı müsmire ve gayr-ı müsmireyi müştemil mülk menzil münâdîlerden Mehmed Çelebi b. Ahmed yediyle sûk-ı sultânî ve mecma‘-ı nâs olan mahâllerde otuz gün mikdârı nidâ ve müzâyede olunup rağabât-ı nâs bi’l-külliye munkatı‘a oldukdan sonra mezbûr Halil Efendi üzerinde bin guruşda karâr edip ziyâde ile tâlib-i âhar dahi zuhûr etmeyip ve meblağ-ı mezbûr menzil-i mahdûd-ı mezbûrun el-yevm semen-i misli idiği zeyl-i vesîkada muharrerü’l-esâmi Müslimîn haberleriyle lede’ş-şer‘i’ş-şerîfi’l-enver zâhir ve nümâyân oldukdan sonra tashîh-i mezbûr üzere menzil-i mezbûrdan benim hisseme isâbet eden yirmi bir sehm-i şâyi‘im ile kızım sagīre-i mezbûrenin kezâlik tashîh-i mezbûr üzere menzil-i mezbûrdan hissesine isâbet eden kırk iki sehm-i şâyi‘i ki cem‘an altmış üç sehm-i şâyi‘imizi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî, şurût-ı müfsideden ârî bey‘-i bâtt-ı sahîh-i şer‘î ile mezbûr Halil Efendi’ye yirmi altı bin iki yüz elli akçeye bey‘ ve temlîk ve teslîm, ol dahi menzil-i mezbûrda olan altmış üç sehm-i şâyi‘imizi iştirâ ve temellük ve tesellüm ve kabz ve kabûl edip hisse-i mezkûrelerin semeni olan meblağ-ı mezbûr yirmi altı bin iki yüz elli akçeyi asâlet ve vesâyetim hasebiyle mezbûr Halil Efendi yedinden bi-kadri’l-hısas bi’t-tamâm ve’l-kemâl alıp kabz eyledim, ba‘de’l-yevm tashîh-i mezbûr üzere iki yüz seksen sekiz sehim i‘tibâr olunan menzil-i mahdûd-ı mezbûrun elli sehmi iki mertebede ırsen mezbûre Hadîce Hatun’un ve yüz yetmiş beş sehmi iki mertebede kezâlik ırsen ve altmış üç sehmi şirâen ki cem‘an iki yüz otuz sekiz sehmi mezbûr Halil Efendi’nin mülk-i müşterâsı olmuşdur, keyfe mâ yeşâ ve yahtâr mutasarrıf olsunlar dedikde gıbbe’t-tasdîkı’ş-şer‘î vâki‘ hâli âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn