Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 476 Hüküm no: 403 Orijinal metin no: [90a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Kapıcıbaşı Halil Ağa’nın Ali Efendi’ye borcu olduğu Husûs-ı âti’z-zikrin mahâllinde istimâ‘ ve tahrîri için savb-ı şer‘-i şerîf-i enverden mezûnen Mevlânâ Abdülbaki Efendi b. Ahmed Efendi irsâl olunup ol dahi mahmiye-i İstanbul’da Ahırkapı kurbünde İshak Paşa mahâllesinde sâkine Âişe Hanım bt. el-merhûm Hazînedâr Ali Paşa’nın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf [edip] mahmiye-i mezbûrede Kumkapı kurbünde Nişâncı Mehmed Paşa-i Atik mahâllesinde sâkin umdetü erbâbi’t-tahrîr ve’l-kalem bâ‘isü’l-kitâb Ali Efendi b. el-Hâc İsa meclis-i ma‘kūd-ı mezbûrda zikr olunan İshak Paşa mahâllesinde sâkin iken bundan akdem vefât eden merhûm Kapıcıbaşı Halil Ağa b. Hüseyin’in zevce-i menkûha-i metrûkesi olmağla terekesine bi’l-verâse vâzı‘atü’l-yed olup Şeyh Mahfuz Efendi b. Ahmed ve Mustafa Efendi b. Hüseyin ta‘rîfleriyle mu‘arrefe olan mezbûre Âişe Hanım ile merhûm-ı mezbûrun li-ebeveyn karındaşları olup vilâyet-i Rumeli’nde Radoviş kazâsına tâbi‘ Baçova karyesinde sâkin Mustafa Ağa ve Abdurrahman’ın ve Cafer Ağa ve li-ebeveyn kız karındaşları Neslihan Hatun ve Hadîce Hatun’un hisse-i ırsiyelerini ahz u kabz ve zabt u hıfza kıbel-i şer‘den vasî ve kayyım nasb olunan mezbûre Neslihan Hatun’un sulbî kebîr oğlu Süleyman Çelebi ve Derviş Mehmed mahzarlarında üzerlerine da‘vâ ve takrîr-i kelâm edip merhûm-ı mezbûr Kapıcıbaşı Halil Ağa b. Hüseyin b. Mustafa zimmetinde yedimde olan bin yüz kırk iki senesi Zilka‘desinin yirmi ikinci günü târîhiyle müverrah mümzâ ve mahtûm temessük mûcebince cihet-i karzdan bin üç yüz guruş hakkım olup hattâ merhûm-ı mezbûr cihet-i karzdan zimmetinde bana ol kadar guruş vâcibü’l-edâ deyni olduğunu târîh-i mezkûrda huzûr-ı Müslimînde ikrâr ve işhâd ettikden sonra meblağ-ı mezbûrun beş yüz elli guruşunu merhûm-ı mezbûrun hayâtında yedinden ahz u kabz, bâkī yedi yüz elli guruşu kable’l-edâ fevt olmağla meblağ-ı bâkī-i mezbûr yedi yüz elli guruşu terekesinden taleb ederim, suâl olunsun dedikde gıbbe’s-suâl mezbûrân Süleyman Çelebi ve Âişe Hanım cevâblarında tereke-i merhûm-ı mezbûra ber-vech-i muharrer vaz‘-ı yedlerini ikrâr ve müdde‘î-i mezbûrun ber-vech-i mübeyyen üzere müdde‘âsını inkâr edicek, müdde‘î-i mezbûrdan müdde‘âlarına beyyine taleb olunndukda udûl-i ahrâr-ı ricâl-i Müslimînden mahmiye-i mezbûrede Dülbendçi Hüsam mahâllesinde sâkin mu‘arrif-i mezbûr Mustafa Efendi b. Hüseyin ve mârrü’z-zikr İshak Paşa mahâllesinde [sâkin] Ebubekir Çavuş Ağa b. Abdülbaki ve Nişâncıpaşa-i Atik mahâllesinde sâkin Abdüllatif Efendi b. Yakub li-ecli’ş-şehâde meclis-i ma‘kūd-ı mezkûrûna hâzirûn olup isre’l-istişhâd fi’l-hakīka merhûm-ı mezbûr Kapıcıbaşı Halil Ağa b. Hüseyin b. Mustafa müdde‘î-i mezbûr Ali Efendi’ye yedinde olan bin yüz kırk iki senesi Zilka‘desinin yirmi ikinci günü târîhiyle müverrah mümzâ ve mahtûm temessük mûcebince cihet-i karzdan bin üç yüz guruş zimmetinde vâcibü’l-edâ deyni olduğunu târîh-i mezkûrda huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle oldukdan sonra müdde‘î-i mezbûrun kabzını mu‘terif olduğu meblağ-ı mezbûr beş yüz elli guruşdan mâ‘adâ meblağ-ı bâkī-i mezbûr yedi yüz elli guruşu dahi merhûm-ı mezbûrdan hayâtında küllen veyâ ba‘zan ahz ü istîfâ veyâ hibe veyâ âhara havâle etmeyip taraf-ı şer‘îden bir tarîk ile zimmetini ibrâ eylemediğine müdde‘î-i mezbûr Ali Efendi’ye yemîn teklîf olundukda ol dahi hasbe’l-mesûl yemîn billâhi’l-aliyyi’l-a‘lâ etmeğin mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel Ahmed Çelebi b. İsmail ve Ali Çelebi b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 13 min-Şa‘bân sene 1143. Şuhûdü’l-hâl: Mehmed Ağa b. Ahmed, Hüseyin Efendi b. Mehmed, Şeyh Mahfuz Efendi b. Ahmed, Ahmed Efendi b. Ali el-İmam, Hasan Bey b. Hüseyin, Osman b. Hasan, İbrahim Çelebi b. Hüseyin, Hasan b. Ömer