Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 477 Hüküm no: 404 Orijinal metin no: [90b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın vefat eden kocası Kapıcıbaşı Halil’de mehir alacağı olduğu Kezâlik akd-i meclis-i şer‘-i şerîf ettikde bâ‘isetü’l-kitâb mezbûre Âişe Hanım bt. el-merhûm Ali Paşa b. Mehmed tarafından husûs-ı âti’l-beyana vekîl-i müsecceli umdetü erbâbi’t-tahrîr ve’l-kalem Ali Efendi b. el-Hâc İsa meclis-i ma‘kūd-ı mezkûrda mahâlle-i mezbûrede sâkin iken bundan akdem vefât eden merhûm Kapıcıbaşı Halil b. Hüseyin’in li-ebeveyn karındaşı olmağla terekesine bi’l-verâse vâzı‘ü’l-yed olan Süleyman Ağa mahzarında bi’l-vekâle üzerine da‘vâ ve takrîr-i kelâm edip merhûm-ı mezbûr Kapıcıbaşı Halil Ağa b. Hüseyin b. Mustafa fevtinden sekiz ay mukaddem tezevvüc murâd eylediğinde müvekkile-i mezbûre Âişe Hanım’ı otuz altı bin akçe mehr-i mu‘accel ve elli bin akçe mehr-i müeccel tesmiyesiyle huzûr-ı Müslimînde tezevvüc ve kabûl edip akd-i nikâh beynlerinde kāim iken meblağ-ı mezbûr seksen altı bin akçeyi kable’l-edâ fevt olmağla terekesinden taleb ederim, suâl olunsun dedikde gıbbe’s-suâl mezbûr Süleyman Ağa cevâbında tereke-i merhûm-ı mezbûra ber-vech-i muharrer vaz‘-ı yedini ikrâr, vekîl-i mezbûrun ber-vech-i muharrer üzere müdde‘âsına beyyine taleb olundukda udûl-i ahrâr-ı ricâl-i Müslimînden zikr olunan İshak Paşa mahâllesinde sâkin Şeyh Mahfuz Efendi b. Ahmed ve İbrahim Ağa b. Mustafa li-ecli’ş-şehâde meclis-i ma‘kūd-ı mezkûrda hâzırân olup istişhâd olundukda fi’l-hakīka merhûm-ı mezbûr Kapıcıbaşı Halil Ağa b. Hüseyin b. Mustafa fevtinden sekiz ay mukaddem tezevvüc murâd eylediğinde müvekkile-i mezbûre Âişe Hanım bt. el-mezbûr Hazînedâr Ali Paşa b. Mehmed’i huzûrumuzda otuz altı bin akçe mehr-i mu‘accel ve elli bin akçe mehr-i müeccel tesmiyesiyle tezevvüc ve kabûl edip akd-i nikâh beynlerinde kāim iken vefât eyledi, biz bu husûsa bu vech üzere şâhidleriz ilâ-âhırihî gıbbe’t-tahlîfi’l-müvekkil-i mezbûre mûcebiyle ba‘de’l-hükm. Fi’l-yevmi’s-sâdis min-Şa‘bân sene 1143. Şuhûdü’l-hâl: Mustafa Efendi b. Hüseyin, es-Seyyid Abdüllatif Efendi b. Yakub, Süleyman Çelebi b. Derviş, Hasan Çelebi b. Hüseyin, Hüseyin Çelebi b. Mehmed, Molla Halil b. Mehmed, Ahmed Çelebi b. Abdullah, Hasan b. Ömer