Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 492 Hüküm no: 416 Orijinal metin no: [94a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hibetullah Çelebi’nin ortağı Taşçı Mehmed Çelebi vefat ettiğinden hakkının terekeden verilmesi Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden Mevlânâ es-Seyyid Ali Efendi irsâl olunup ol dahi mahmiye-i İstanbul’da Kādızâde mahâllesinde sâkin iken bundan akdem vefât eden Taşçı Mehmed Çelebi b. Mustafa’nın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde işbu bâ‘isü’l-kitâb Hibetullah Çelebi b. Şa‘bân meclis-i ma‘kūd-ı mezbûrda müteveffâ-yı mezbûrun zevce-i menkûha-i metrûkesi ve sulbiye sagīre kızı Hadîce’nin tesviye-i umûruna kıbel-i şer‘den mansûbe vasiyyesi olmağla terekesine bi’l-verâse ve bi’l-vesâye vâzı‘atü’l-yed olup zâtı ta‘rîf-i şer‘î ile mu‘arrefe olan Fâtıma Hatun bt. İsmail mahzarında üzerine da‘vâ ve takrîr-i kelâm edip müteveffâ-yı mezbûr Taşçı Mehmed Çelebi b. Mustafa b. Abdullah hayâtında bin yüz kırk üç senesi Muharremü’l-haramı gurresinde mâlından elli guruşu ve ben dahi mâlımdan elli guruş ifrâz ve birbirine halt ve hâsıl olan fazla beynimizde münâsafeten iktisâm olunmak üzere taşçı ticâretinde huzûr-ı Müslimînde akd-i şirket edip ticâret üzere iken kable feshi’ş-şirket mezbûr Mehmed Çelebi fevt olmağla re’s-i mâlım olan elli guruşu terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Kefeli mahâllesinde sâkin İbrahim Beşe b. Ahmed ve Nişâncıpaşa mahâllesinde sâkin Ahmed Çelebi b. İbrahim li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Taşçı Mehmed Çelebi b. Mustafa b. Abdullah hayâtında bin yüz kırk üç senesi Muharremü’l-haramı gurresinde mâlından elli guruşu ifrâz işbu müdde‘î-i mezbûr dahi kendi mâlından elli guruşu ifrâz ve birbirine halt edip ve hâsıl olan fazla beynlerinde münâsafe ve iktisâm olunmak üzere taşçılık ticâretinde akd-i şirket edip ticâret üzere iken kable feshi’ş-şirket mezbûr Mehmed Çelebi fevt oldu biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ve ma‘an mürsel el-Hâc İbrahim b. Hasan ve İbrahim Çelebi b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 29 min-Recebi’l-ferd sene 1143. Şuhûdü’l-hâl: Es-seyyid İsmail Çelebi b. Mustafa, Hüseyin Çelebi b. Hasan, Mustafa Çelebi b. Mehmed, Abdullah Beşe b. İsmail, Ahmed Beşe b. İbrahim