Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 493 Hüküm no: 417 Orijinal metin no: [94a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın vefat eden Mehmed’de alacağı olduğu Husûs-ı âti’l-beyanın mahâllinde istimâ‘ ve tahrîri iltimâs olunmağın savb-ı şer‘-i enverden mezûnen Mevlânâ es-Seyyid Yahya Efendi irsâl olunup mahmiye-i İstanbul’da Yemiş İskelesi’nde kuru yemiş tüccârından el-Hâc Mustafa b. Mehmed’in mahzen odasına varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede hâlâ kantar emîni vekîli bâ‘isü’l-kitâb el-Hâc Ali Ağa b. Abdullah meclis-i ma‘kūd-ı mezkûrda mahmiye-i mezbûrede Üskübî mahâllesinde sâkin iken bundan akdem vefât eden el-Hâc Mehmed b. el-Hâc Abdullah’ın dâmâdı ve evlâd-ı sıgārı Abdullah ve Âişe ve Zeyneb’in tesviye-i emrlerine kıbel-i şer‘den mansûb vasîleri olmağla terekesine bi’l-vesâye vâzı‘ü’l-yed olan Hasan Hoca b. Abdullah mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Mehmed b. el-Hâc Abdullah b. Abdullah zimmetinde işbu yedimde olan mümzâ ve mahtûm ve bin yüz kırk bir senesi Muharremü’l-haram gurresi târîhiyle müverrah temessük mûcebince cihet-i karz-ı şer‘îden beş yüz guruş hakkım olup hattâ müteveffâ-yı mezbûr [94b] hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip ve meblağ-ı mezbûrun iki yüz elli guruşunu hayâtında yedinden ahz u kabz edip bâkī iki yüz elli guruşu kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden müteveffâ-yı mezbûrun karındaşı Ali Odabaşı b. el-Hâc Abdullah ve Abdullah Çelebi b. Mehmed ve Abdullah Ağa b. el-Hâc Hüseyin li-ecli’ş-şehâde meclis-i ma‘kūd-ı mezkûra hâzirûn olup isre’l-istişhâd fi’l-vâki‘ müteveffâ-yı mezbûr el-Hâc Mehmed b. el-Hâc Abdullah b. Abdullah hâl-i kemâl-i sıhhatinde işbu müdde‘î-i mezbûr el-Hâc Ali Ağa’ya yedinde olan mümzâ ve mahtûm ve bin yüz kırk bir senesi Muharremü’l-haramı gurresi târîhiyle müverrah temessük mûcebince cihet-i karz-ı şer‘îden beş yüz guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikden sonra ba‘de’t-ta‘dîl ve’t-tezkiye şehâdetleri makbûle olmağın kabzına mu‘terif olduğu iki yüz elli guruşdan bâkī iki yüz elli guruşu dahi müteveffâ-yı mezbûrun hayâtında yedinden küllen veyâ ba‘zan ahz ü istîfâ veyâ hibe veyâ âhara havâle etmeyip taraf-ı şer‘îden bir tarîk ile müteveffâ-yı mezbûrun zimmetini ibrâ etmediğine müdde‘î-i mezbûr el-Hâc Ali Ağa’ya yemîn teklîf olundukda ol dahi hasebü’l-mesûl yemîn billâhi’l-aliyyi’l-a‘lâ etmeğin mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ve ma‘an mürsel el-Hâc İbrahim ve el-Hâc Mehmed b. Ahmed ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî-gurreti Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: el-Hâc Abdullah b. Musa, el-Hâc Mustafa b. el-Hâc Ali, es-Seyyid el-Hâc Mehmed Ağa [b.] Nurullah, el-Hâc Süleyman b. Ahmed, el-Hâc Ömer b. Abdullah, Mustafa Çelebi b. el-Hâc Musa