Bab Mahkemesi 54 Numaralı Sicil (H. 1102 / M. 1691) cilt: 20, sayfa: 106 Hüküm no: 82 Orijinal metin no: [13a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Reis b. Mehmed’in Abdülkerim Odabaşı b. İbrahim’e tüfenk satışından olan borcunu kabul etmesi Mahmiye-i İstanbul’da vâki‘ Tüfenkçi tâifesinden işbu râfi‘ü’l-kitâb Abdülkerim Odabaşı b. İbrahim nâm kimesne meclis-i şer‘-i şerîf-i enver ve mahfil-i dîn-i münîf-i [ezherde], sefîne reislerinden es-Seyyid Ali Reis b. es-Seyyid Mehmed nâm kimesne mahzarında ikrâr ve takrîr-i kelâm edip, semeni târih-i kitâbdan ( ) güne değin müeccel olmak üzre yedimde mülküm olan iki aded cedîd tüfengimi safka-i vâhide ile merkūm es-Seyyid Ali Reis’e yüz kıt‘a esedî guruşa kat‘an bey‘ ve temlîk ve teslîm, ol dahi ber vech-i muharrer yedimden iştirâ ve temellük ve kabz etmekle, semen-i mezbûr yüz esedî guruş merkūm es-Seyyid Ali Reis’in zimmetinde bana deyni olmağın, hâlâ merkūm es-Seyyid Ali Reis’e suâl olunup, takrîri tahrîr olunmak matlûbumdur dedikde, gıbbe’s-suâl merkūm Ali Reis cevâbında, kaziyye minvâl-i muharrer üzre olup, mezbûr Abdülkerim Odabaşı yedinden ber vech-i meşrûh iştirâ ve kabz eylediğim iki aded tüfengin bahâsından yüz kıt‘a esedî guruş zimmetimde merkūm Abdülkerim Odabaşı’ya vâcibü’l-edâ müeccel deynimdir dedikde, mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Cemâziyelevvel sene 1102. Şuhûdü’l-hâl: Ali Efendi b. Mustafa, İbrahim Efendi b. Şaban, İbrahim Çelebi b. Ahmed, Osman b. Hasan, es-Seyyid Ali Çavuş b. Mustafa, es-Seyyid Mehmed Çavuş b. Hasan, es-Seyyid Ebûbekir Çavuş b. Mehmed, es-Seyyid İbrahim Çavuş b. ( ), Receb Beşe.