Bab Mahkemesi 54 Numaralı Sicil (H. 1102 / M. 1691) cilt: 20, sayfa: 107 Hüküm no: 83 Orijinal metin no: [13a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Ali b. Hasan Ağa’nın arazisini Mehmed Ağa b. Mahmud’a satması Vilâyet-i Anadolu’da Pazarsuyu kazâsına tâbi‘ Bayramşah-ı Bâlâ nâm karye sükkânından es-Seyyid Ali b. Hasan Ağa nâm kimesne meclis-i şer‘-i şerîf-i şâmihu’l-imâd ve mahfil-i dîn-i münîf-i râsihü’l-evtâdda, yine karye-i mezbûre sükkânından Mehmed Ağa b. Mahmud nâm kimesne mahzarında ikrâr-ı sahîh-i şer‘î ve i‘tirâf-ı sarîh-i mer‘î kılıp, karye-i mezbûre sınırı dâhilinde Yumrutaş demekle ma‘rûf mevzi‘de vâki‘ lede’l-ahâlî ve’l-cîrân ma‘lûmü’l-hudûd taht-ı tasarrufumda olan bir kıt‘a tarlamı, bâ-ma‘rifet-i sâhib-i arz-ı merkūm Mehmed Ağa’ya on guruş bedel mukābelesinde ferâğ ve tefvîz, ol dahi ber vech-i muharrer tefevvüz ve kabûl eylediğinden sonra bedel-i ferâğ olan meblağ-ı mezbûr on guruşu mezbûr Mehmed Ağa bana def‘ ve teslîm, ben dahi yedinden bi’t-tamâm ahz u kabz edip, mârru’z-zikr tarlayı mahallinde zabt u tasarrufa mezbûru taslît, ba‘de’l-yevm mârru’z-zikr tarlada benim hakk ve alâkam kalmayıp mezbûr Mehmed Ağa’nın dâhil-i havza-i tasarrufu olmuşdur dedikde, gıbbe’t-tasdîki’l-mu‘teberi’l-vicâhî mâ vaka‘a bi’t-taleb ketb ve imlâ olundu. Fi’l-yevmi’s-sâmin ve’l-ışrîn min Cemâziyelevvel sene 1102. Şuhûdü’l-hâl: Es-Seyyid Mehmed Efendi b. es-Seyyid Şeyh Mahmud, Mehmed Efendi b. Ahmed, es-Seyyid Ali b. es-Seyyid Mehmed, Şeyh Hasan Efendi, Musli Beşe b. Mehmed, Ali Çelebi b. Yahya.