Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 504 Hüküm no: 429 Orijinal metin no: [97a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Emine Hatun’un kızı Ayşe’ye nafaka takdiri Mahmiye-i İstanbul’da Beyceğiz mahâllesinde sâkine iken bundan akdem vefât eden Emine Hatun bt. Ali Efendi’nin sadriye sagīre kızı Âişe’nin min-kıbeli’l-üm ceddesi ve hâdinesi işbu bâ‘isetü’l-kitâb Âişe Hatun bt. Abdullah meclis-i şer‘-i şerîf-i enverde takrîr-i kelâm ve ta‘bîr ani’l-merâm edip hâdinesi olduğum sagīre-i mezbûrenin nafaka ve kisveye eşedd-i ihtiyâcı olmağla vâlidesi müteveffât-ı mezbûreden müntakil mâlından hâdinesiyle ma‘an kıbel-i şer‘den kadr-ı ma‘rûf nafaka ve kisve-baha farz ve takdîr olunmak matlûbumdur dedikde mezbûre Âişe Hatun’un kelimât-ı meşrûhası vâkı‘a mutâbıka idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb bi-tevfîkıhı’r-refî‘i’l-müstetâb -tûbâ-lehû ve hüsnü-meâb- efendi hazretleri sagīre-i mezbûre Âişe’nin vâlidesi müteveffât-ı mezbûreden müntakil mâlından hâdinesiyle ma‘an târîh-i kitâbdan yevmî kırkar akçe nafaka ve kisve-baha farz ve takdîr buyurup meblağ-ı mefrûz-ı mezbûr yevmî kırkar akçeyi sagīre-i mezbûre Âişe ile hâdimesinin nafaka ve kisvelerine harc u sarfa ve lede’l-iktizâ istidâne ve inde’z-zafer mâlına rücû‘a hâdine-i mezbûre Âişe Hatun’a kıbel-i şer‘den izin birle mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Mehmed Efendi b. Yusuf, İsmail Çelebi b. Abdullah, Mustafa Çelebi b. Mehmed, Ahmed Çelebi b. Abdünnebi, el-Hâc Mehmed Ağa b. Mustafa, el-Hâc Abdi Çelebi b. ( )