Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 503 Hüküm no: 428 Orijinal metin no: [96b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha Hatun’un vefatından sonra vasiyetini yerine getimek üzere Kâğıtçı Mustafa Ağa’yı vasi tayin ettiği Husûs-ı âti’l-beyanın mahâllinde ketb ü tahrîri için savb-ı şer‘-i enverden Mevlânâ Salih Efendi irsâl olunup ol dahi mahmiye-i İstanbul’da Mahmudpaşa mahâllesinde Kâğıdçı el-Hâc Mustafa Ağa b. Abdullah’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde menzil-i mezbûrda sâkine zâtı ta‘rîf-i şer‘î ile mu‘arrefe olan Saliha Hatun bt. Mahmud meclis-i ma‘kūd-ı mezkûrda işbu bâ‘isü’l-kitâb mezbûr Kâğıdçı el-Hâc Mustafa Ağa mahzarında ikrâr ve takrîr-i kelâm edip bi-emrillâhi te‘âlâ vefât eylediğimde vasiyy-i muhtâr eylediğim merkūm el-Hâc Mustafa Ağa yedinde olan memhûr defter-i müfredât mûcebince cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görülüp düyûn-ı müsbetesi edâ olundukdan sonra bâkī kalan terekemin sülüsü ifrâz olunup sülüs-i mezbûrdan kadr-ı ma‘rûf meblağ ile ıskāt-ı salâtım ve ta‘mîr-i kabrim ve eyyâm-ı mübârekede tabh-ı ta‘âm ve it‘âm-ı fukarâ oluna ve kadr-ı ma‘rûf meblağ ile dört mushaf-ı şerîf iştirâ olunup biri Sarı Mustafa Bey dâmâdına verile ve üçü mekteb hocası Abdullah Efendi’ye verilip ol dahi birini sülehâdan Molla Abdullah’a vere ikisini dahi kendi re’yiyle müstahakkına vere ve sülüs-i mezbûrdan otuz guruş ile mahâlle-i mezbûrede vâki‘ es-Seyyid el-Hâc Hüseyin’in menzilinde bir bi’r-i mâ hafr oluna ve yirmi guruş ile merkūm Abdullah Efendi’nin mektebine bir kaliçe iştirâ olunup vaz‘ oluna ve onar guruş vârisim olmayan li-üm karındaşım Mehmed ile kız karındaşım oğulları Ali ve Hasan’dan her birine verile ve yirmi guruş vasiyy-i muhtâr eylediğim merkūm Kâğıdçı el-Hâc Mustafa’ya ve kendi için ahz eyleye ve sülüs-i mezbûrdan fazla kalırsa vasiyy-i muhtârım re’yiyle vücûh-ı birre ve hayra harc u sarf oluna [97a] ve sülüsân-ı terekem mahrûse-i Edirne’de sâkine sulbiye kebîre kızım Kerime Hatun’a îsâl oluna deyü vasiyet edip tenfîzine işbu merkūm el-Hâc Mustafa Ağa’yı vasiyy-i muhtâr nasb u ta‘yîn eyledim dedikde ol dahi ber-vech-i muharrer vesâyet-i mezbûru kabûl ve hizmet-i lâzımesini kemâ-yenbağī edâya ta‘ahhüd ve iltizâm eylediğini mevlânâ-yı mezbûr mahâllinde tahrîr ba‘dehû ma‘an irsâl olunan Ahmed Çelebi b. Hasan ve Ali b. Abdullah ile meclis-i şer‘a gelip alâ-vuku‘ihî inhâ ve ikrâr etmeğin mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Şa‘bâni’l-mu‘azzam sene 1143. Şuhûdü’l-hâl: Abdullah Efendi b. İbrahim Hoca, el-Hâc Mustafa b. el-Hâc Hüseyin, Mustafa Çelebi b. Ali, Hâfız Molla Mehmed b. Selim, İsmail Efendi b. Mehmed imam, el-Hâc Osman b. ( ) kâğıdçı (...)