Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 33 Hüküm no: 1 Orijinal metin no: [İç kapak] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bâb-ı Fetva’ya bağlı iken Vaka-i hayriye’den sonra özel şahıslara satılmış olan iki aded bina arsasının hazinece satın alınması Bâb-ı vâlâ-yı fetvâya merbût iken Vak‘a-i hayriye’den sonra ne takrîb ise âhara fürûht olunmuş olan iki bâb hâne mukaddemâ muhterik olarak arsa-i hâliye olduğu hâlde muahharen ikisi bir âdeme geçip sâhibi dahi vefât eylemiş olmasıyla bu def‘a veresesi tarafından elli bin guruşa fürûht olunacağından ve mahâll-i mezkûrun Bâb-ı mezkûra ittisâli cihetiyle binâ yapılmasında muhterik olduğundan meblağ-ı mezkûrun hazîne-i celîleden i‘tâsıyla mahâll-i mezkûrun taraf-ı saltanat-ı seniyyeden mübâya‘asıyla Bâb-ı mezkûra ilâvesi husûsuna vukū‘ bulan iş‘ar üzerine bi’l-istîzân irâde-i seniyye-i cenâb-ı pâdişâhî müte‘allık ve şeref-sudûr buyrulmuş ve keyfiyet taraf-ı hazret-i Meşîhat-penâhîye ve Evkāf-ı hümâyûn Nezâret-i celîlesi’ne bildirilmiş olmağla bi’l-muhâbere ber-mantûk-ı irâde-i seniyye icrâ-yı iktizâsına himmet olunmak bâbında ve beyaz üzerine sâdır olan fermân-ı âlî mûcebince iktizâsı Masârıfât Muhâsebesi’nden suâl ve îcâbı Sadr-ı Rumeli semâhatlü ve Evkāf-ı hümâyûn müfettişi fazîletlü Efendiler hazerâtı taraflarından isti‘lâm olundukda mezkûr iki bâb muhterik menzil arsalarına mutasarrıf Mustafa Rüşdü Efendi ve Emine Hanım ile müteveffâ Abdülvahab Ağa veresesi taraflarından bâ-hüccet-i şer‘iyye vekîlleri ketebeden Mustafa Bey mezkûr arsaların ellibin guruş bedel ile bey‘ ve temlîke râzı olduklarından ol vechile mârrü’z-zikr arsalar semeni olan mezkûr elli bin guruşun yetmiş üç senesi ebniye tertîbinden olarak Mâliye Hazînesi’nden i‘tâsı için sûret ve keyfiyet ma‘lûm olmak ve atik iki kıt‘a hüccet-i şer‘iyye kaydları terkīn kılınmak üzere Mahfil-i şer‘iyyât ile Eshâm Muhâsebesine ilmühaberleri tahrîri iktizâ eylediği derkenâr olunarak mûcebince sûret ve ilmühaberleri verlimek fermân-ı sâmî buyrulmağın mûcebince kaydolunup sûret ve diğere ilmühaberi verilmekle ber-minvâl-i muharrer keyfiyet ma‘lûm olmak için Mahfil-i şer‘iyyât tarafına işbu ilmühaber verildi. Fî 23 Ş sene 1273 (Ahmet Aynî) Derûn-ı i‘lâmda muharrer hüccetin bir adedi fî 19 Ca sene [1]261 târîhiyle mevcûd olan hüccet sahîfeden terkīn olunmuşdur. Fî 15 L sene [12]73.