Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 33 Hüküm no: 2 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halep valisi Mustafa Paşa’nın hizmetkârlarından Abdülmümin Ağa’ya kefaletten dolayı olan borcunu ödemesi hususunda Mehmed Ağa’ya tenbih olunması Hüve Yâ Fettâh, Yâ Rezzâk, Yâ Alîm Hâlâ fermân-revâ-yı revnak-efzâ-yı mesned-i vâlâ-yı Sadr-ı Rumeli a‘lemü’l-ulemâi’l-mütebahhirîn efdalü’l-fudalâi’l-müteverri‘în ferîdü’l-asri bi’l-fazl ve’l-kemâl vahîdü’d-dehri bi’ş-şeref ve’l-iclâl yenbû‘u’l-efâzıl câmi‘u mehâsini’l-ahlâk zıll-ı e‘âzımü’l-âfâki’l-âlemü’r-rabbânî ve’t-tahrîrü’l-fâzıli’s-samedânî ekmelü’l-mütekaddimîn ve’l-müteahhirîn sâbıkā İmam-ı evvel-i hazret-i şehriyârî semâhatlü es-Seyyid Mustafa İzzet Efendi hazretlerinin def‘a-i ûlâ sadâreti’l-ulyâlarında vâki‘ olan i‘lâmât-ı şer‘iyyâtın evvelki sicill-i mahfûzlarıdır. Fî-nevbeti fahrü’l-müderrisîni’l-kirâm hâlâ şer‘iyyâtî mekremetlü es-Seyyid Halil Efendi -dâme muvaffakan bi’l-hayr- Fî-gurreti Receb sene [12]73 Halebü’ş-şehbâ vâlisi devletlü Mustafa Paşa hazretlerinin teba‘asından es-Seyyid Abdülmümin Ağa b. Süleyman nâm kimesne mahfil-i şer‘iyyâtda canbaz esnâfından Mehmed Ağa b. Osman muvâcehesinde benim gāib ani’l-meclis yine esnâf-ı merkūmeden Ahmed Ağa b. Abdullah zimmetinde malımdan ve yedimden iştirâ ve kabz eylediği bir re’s kır bargir semeninden alacak hakkım olan sekiz yüz guruşa işbu merkūm Mehmed Ağa tarafından bi’l-emr ve’l-kabûl kefâlet-i mutlakā-i sahîha-i şer‘iyye ile kefil ve zâmin oldukdan sonra mebâliğ-i mekfûlün-bih-i mezkûr sekiz yüz guruşun beş yüz yirmi guruşunu kefâlet-i mezkûresine binâen bundan akdemce bana edâ ve teslîm etmekle bâkīsi olan iki yüz seksen guruşu dahi merkūm Mehmed Ağa’dan kefâlet-i mahkiyesine binâen hâlâ taleb ederim deyü ba‘de’d-da‘vâ ve’l-istintâk ol dahi cevâbında kazıyye minvâl-i muharrer üzere olup meblağ-ı mekfûlün-bih bâkī-i mezkûr iki yüz seksen guruş müdde‘î-i merkūm es-Seyyid Abdülmümin Ağa’ya cihet-i kefâletden el-yevm zimmetinde sahîhan deyni olduğunu bi-tamâmihî tâyi‘an ve kat‘iyyen ikrâr u i‘tirâf etmeğin mûcebince meblağ-ı mekfûlün-bih bâkī-i mezkûr iki yüz seksen guruşun müdde‘î-i merkūm es-Seyyid Abdülmümin Ağa’ya bi-hükmi’l-kefâle hâlâ edâ ve teslîmiyle mezbûr Mehmed Ağa ilzâm olunduğu mübâşirleri Bâb-ı zabtiye neferâtından Divriğli Musa Ağa kulları yediyle huzûr-ı [âlîlerine i‘lâm olundu]. Fî 3 B sene [12]73.