Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 78 Hüküm no: 55 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Samatyalı Mıgırdıç’ın Niğdeli Hasan Ağa aleyhindeki alacak iddiasının kanunsuz olması Erzincanî Hüseyin Kavvâs kaydıyla Langalı İbrahim Kavvâs’a teslîm Ma‘rûz, Devlet-i aliyye teba‘asından ve kuyumcu esnâfından arzuhâl eden Samatyalı Mıgırdıç v. Mesrop mahfil-i şer‘iyyâtda Kısmet-i Askeriye Mahkemesi mahzarında derûn-ı arzuhâlde mezkûrü’l-ism Niğdeli Hasan Ağa b. Mehmed muvâcehesinde mezbûr Hasan Ağa ile mu‘ârefe-i kadîmem olmak hasebiyle umûr-ı zabtiye mu‘âvini olup bundan [akdem] vefât eden Mehmed Bey’in hîn-i vefâtında İstanbul’da Ebulfeth Gāzî Sultân Mehmed Han -aleyhi’r-rahmetü ve’l-gufrân- hazretleri câmi‘-i şerîfi civârında vâki‘ konağında terekesi Kısmet-i Askeriye Mahkemesi cânibinden ma‘rifet-i şer‘le tahrîr olunduğu hînde mezbûr Hasan Ağa tereke-i müteveffâtı mûmâ-ileyhin muhzırı olduğundan beni bi’l-ma‘iyye konağ-ı mezkûra götürdüğünde konağ-ı mezkûre gelmiş olan gāib ani’l-meclis Nafiz Bey nâm kimesnenin kendi malı olan ve işbu meclis-i şer‘de mu‘âyene olunan bir aded Lahori şalını münâdî ma‘rifetiyle tereke malı misillü âhara bey‘ olunmak üzere iken ben zikr olunan şalı lede’l-müzâyede dört bin beş yüz guruş semen tesmiyesiyle kimesnenin cebr ü ikrâhı olmaksızın münâdî yedinden rızâmla nefsim için iştirâ ve kabz etmiş idim. Lâkin mezkûr şalın ol târîhde kıymeti ancak iki bin guruş olmağla ol vechile benim iki bin beş yüz guruş hasarâtım ve husûs-ı mezkûra mücerred mezbûr Hasan Ağa’nın beni mahâll-i mezkûra götürmesi sebeb olmuş olmağla öyle olucak meblağ-ı hasarât-ı mezkûr iki bin beş yüz guruşu bana kendi malından vermek üzere mezbûr Hasan Ağa’ya cebr ü tenbîh olunmak murâdımdır deyü takrîr-i meşrûhu üzere inkârına mukārin tasaddî eylediği da‘vâsı bu mertebe ile meşrû‘a ve iltifâta şâyân olmadığı müdde‘î-i merkūm Mıgırdıç’a tefhîm ve mûcebince da‘vâ-i mezkûresiyle mezbûr Hasan Ağa’ya bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu]. Fî 11 L sene [12]73. el-Hâc İbrahim.