Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 79 Hüküm no: 57 Orijinal metin no: [11a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şekerci Osman Ağa’ya olan borcunu ödemesi hususunda üvey oğlu Yusuf Ağa’ya tenbih olunması Üveyi oğlu mezbûr Yusuf Ağa’ya teslîm. İşbu kaydın bâlâsında terkīn olunan kayd bu mahâlle ba‘de’t-tashîh kaydolunmağla şerh verildi. [Mühür:] Seyyid Halil Ma‘rûz, Şekerci esnâfından bâ‘isü’l-i‘lâm el-Hâc Osman Ağa b. Mehmed mahfil-i şer‘iyyâtda üveyi oğlu esnâf-ı merkūmeden Yusuf Ağa b. Halil muvâcehesinde ben üveyi oğlum mezbûr Yusuf Ağa’nın bi-şarti’r-rücû‘ emriyle akdi merkūme izâfetle âhardan iştirâ ve kabz ve kendüye bi-a‘yânihâ i‘tâ ve teslîm eylediğim ba-defter-i müfredât elbise-i müte‘addide-i ma‘lûme esmânına malımdan medfû‘um olup oğlum mezbûr Yusuf Ağa zimmetinde bi’l-mürâca‘a alacak hakkım olan dört yüz guruşu üveyi oğlum mezbûr Yusuf Ağa’dan bi’l-mürâca‘a hâlâ taleb ederim deyü tasaddî eylediğim da‘vâmdan bâ-tavassut-ı muslihîn üveyi oğlum mezbûr Yusuf Ağa ile bi’t-tav‘ ve’r-rızâ üç yüz guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı merkūmdan mâ‘adâ ziyâde müdde‘âma müte‘allıka da‘vâdan ben mezbûr Yusuf Ağa’nın zimmetini, ol dahi kezalik benim zimmetimi tarafeynden her birimiz ibrâ-i sahîh-i şer‘î ile kabûlümüzü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı merkūm üç yüz guruşu müdde‘î-i merkūm el-Hâc Osman Ağa’ya edâ ve teslîme mezbûr Yusuf Ağa’ya tenbîh olunduğu bi’l-iltimâs huzûr-ı [âlîlerine i‘lâm olundu]. Fî 7 L sene [12]73. Akif.