Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 152 Hüküm no: 128 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anaştaş v. Dimitri’nin bilgisi olmadan kardeşi Vasil tarafından Duvarcı Dimitri’ye satılmış olan bağ ve tarlalarını geri alması Hademe-i Âsafî’den Tophaneli Ali Ağa’ya teslîm şüd. Ma‘rûz, Vilâyet-i Rumeli’de Manastır sancağına tâbi‘ Nasliç kazâsına muzâfe Can karyesi ahâlîsinden ve Devlet-i aliyye teba‘asının Rum milletinden sâhib-i arzuhâl Duvarcı Anaştaş v. Dimitri mahfil-i şer‘iyyâtda yine Devlet-i aliyye teba‘asının Rum milletinden derûn-ı arzuhâlde mezkûrü’l-ism Duvarcı Dimitri v. Kosti muvâcehesinde karye-i mezkûre hudûdu dâhilinde vâki‘ Sipâhî Çeşmesi nâm mahâlde kâin bir tarafdan Kostandi v. Yani v. Adam ve bir tarafdan Panayot v. Angeli v. Panayot ve bir tarafdan Dimitri v. Yorgi v. Hıristo bağları ve taraf-ı râbi‘i tarîk-i âm ile mahdûd kürûmu mülk tahmînen iki buçuk dönüm mikdârı bir kıt‘a bağ benim müstakillen yedimde malım ve mülküm ve karye-i mezbûre civârında Bıçak karyesi hudûdu dâhilinde Eski Kilise nâm mahâlde kâin bir tarafdan Yorgi v. Kosti v. Yani ve bir tarafdan Anaştaş v. Yani v. Kosti ve bir tarafdan merkūm Dimitri menzilleri ve taraf-ı râbi‘i tarîk-i âm ile mahdûd tahmînen iki buçuk dönüm mikdârı bir kıt‘a ve yine karye-i mezbûre hudûdu dâhilinde Pınar? nâm mahâlde vâki‘ bir tarafdan diğer Dimitri v. Hıristo v. Adam ve bir tarafdan merkūm Yorgi ve bir tarafdan merkūm Anaştaş v. Kosta funda ve tarlaları ve taraf-ı râbi‘i tarîk-i âm ile mahdûd tahmînen üç dönüm mikdârı bir kıt‘a ve yine karye-i mezkûre hudûdu dâhilinde Armut nâm mahâlde kâin bir tarafdan dere ve iki tarafdan merkūm Yorgi ve ba‘zan Pandazi v. Mihal v. Adam tarlaları ve taraf-ı râbi‘i tarîk-i âm ile [mahdûd] tahmînen beş dönüm mikdârı bir kıt‘a ve yine karye-i mezbûre hudûdu dâhilinde Emin Çeşmesi’nde Ahlat nâm mahâlde vâki‘ bir tarafdan diğer Dimitri v. Nikola v. Yorgi ve bir tarafdan Kosta v. Yani v. Yorgi tarlaları ve tarafeyni cebel ile mahdûd dört dönüm mikdârı bir kıt‘a ve yine mahâll-i mezkûrda kâin bir tarafdan diğer Kosti v. Nikola v. Apostol tarlası ve bir tarafdan merkūm Yorgi ve bir tarafdan merkūm Kosti v. Yani tarlaları ve taraf-ı râbi‘i tarîk-i âm ile mahdûd üç dönüm mikdârı bir kıt‘a ki cem‘an beş kıt‘a tarlaları benim bâ-temessük-i sâhib-i arz müstakillen taht-ı tasarrufumda iken li-ebeveyn er karındaşım gāib ani’l-beled Vasil, bağ-ı mahdûd-ı mezkûr ile tarlahâ-yı mahdûde-i mezkûreyi bi-gayrı hakkın merkūm Dimitri’ye semen ve bedel-i makbûz ve ma‘lûm mukābelelerinde bey‘ ve teslîm ve bâ-re’y-i sâhib-i arz ferâğ ve tefvîz edip lâkin ben karındaşım gāib-i merkūm Vasil’in ber-minvâl-i muharrer bey‘ ve ferâğ-ı mezkûrları mücîz olmamamla suâl olunup bağ-ı mahdûd-ı mezkûr ile tarlahâ-yı mezkûreden keff-i yed ve bâ-re’y-i sâhib-i arz mahâllinde bana teslîme merkūma tenbîh olunmak murâdımdır deyü da‘vâ eylediğimde, ol dahi cevâbında kazıyye minvâl-i muharrer üzere olduğunu bi-tamâmihâ tâyi‘an ve kat‘iyyen ikrâr u i‘tirâf etmeğin mûcebince bağ-ı mahdûd-ı mezkûr ile tarlahâ-yı mahdûde-i mezkûreden keff-i yed ve mahâllinde bana teslîme merkūm Dimitri ta‘ahhüd edip bu vechile kat‘-ı münâza‘a eyledik deyü ikrâr ve tasdîkleri tescîl ve huzûr-ı [âlîlerine i‘lâm olundu]. Fî 21 R sene [12]74. el-Hâc İbrahim.