Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 151 Hüküm no: 127 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ayşe’nin varislerinden Ayşe Hatun’un Necibe bt. Yusuf aleyhindeki alacak davasından men olunması Drağmanlı Salih Çavuş’a teslîm şüd. Vilâyet-i Anadolu’da Kengiri sancağına tâbi‘ Tosya kazâsı mahâllâtından Tunç mahâllesi sâkinelerinden iken bundan akdem vefât eden Âişe bt. Halil b. Hüseyin nâm hatunun verâseti sadrî kebîr oğlu Ali ile sadriye kebîre kızları diğer Âişe ve Hadîce Hatunlar ebnâ-yı Halil İbrahim’e münhasıra ba‘dehâ bint-i mezbûre Hadîce Hatun dahi fevt olup verâseti sulbiye kebîre kızı Atiyetullah Hatun bt. Ömer ile li-ebeveyn er karındaşı mezbûr Ali ve li-ebeveyn kız karındaşı mezbûre Âişe Hatun’a münhasıra ba‘dehâ mezbûr Ali dahi fevt olup verâseti zevce-i menkûha-i metrûkesi Penbe Kadın bt. Abdullah ile li-ebeveyn kız karındaşı mezbûre Âişe Hatun’a münhasıra ve tashîh-i mesele-i mîrâsları bi-hükmi’l-münâsahati’ş-şer‘iyye kırk sekiz sehmden olup sihâm-ı mezkûreden otuz beş sehmi mezbûre Âişe Hatun’a ve altı sehmi mezbûre Atiyetullah Hatun’a ve yedi sehmi mezbûre Penbe Kadın’a isâbeti tahakkukundan sonra verese-i mezbûreden sâhibe-i arzuhâl mu‘arrefetü’z-zât mezbûre diğer Âişe Hatun mahfil-i şer‘iyyâtda İstanbul’da Kırkçeşme kurbünde Sekbânbaşı mahâllesinde sâkine derûn-ı arzuhâlde mezkûretü’l-ism kezâlik zâtı mu‘arrefe Necibe Hatun bt. Yusuf muvâcehesinde mezbûre Necibe Hatun işbu târîh-i i‘lâmdan on sene mukaddem vâlidem müteveffât-ı ûlâ-yı mezbûre Âişe Hatun’un hayâtında malından ve yedinden iktirâz ve kabz ve umûruna sarfla istihlâk eylediği zimmetinde alacak hakkı olan bin guruşu kable’l-ahz ve’l-istîfâ fevt ve meblağ-ı mezkûr bin guruş ber-mûceb-i münâsaha-i mezkûr benimle verese-i sâireleri mezbûretâna mevrûs olmağla meblağ-ı mezkûrdan ber-mûceb-i münâsaha-i merkūme benim hisse-i ırsiyeme isâbet eden yedi yüz yirmi sekiz guruş yirmi üç para bir akçeyi mezbûre Necibe hatundan bi’l-verâse hâlâ taleb ederim deyü ba‘de’d-da‘vâ ve’l-istintâk, ol dahi cevâbında müdde‘iye-i mezbûre diğer Âişe Hatun’un ber-vech-i muharrer müdde‘âsını inkâr etmekle müdde‘iye-i mezbûre diğer Âişe Hatun ber-vech-i meşrûh müdde‘âsını isbâtdan izhâr-ı acz birle istihlâf etdikde mezbûre Necibe Hatun bi’l-muvâcehe ber-nehc-i şer‘î tahlîf olunmağın mûcebiyle müdde‘iye-i mezbûre diğer [26a] Âişe Hatun da‘vâ-i mezkûresiyle mezbûre Necibe Hatun’a bilâ-beyyine mu‘ârazadan men‘ olunduğu huzûr-ı [âlîlerine i‘lâm olundu]. Fî 25 Rebî‘ülâhir sene [1]274 Ahmed Arif